Jaqynda Qyzylordada 200 adamǵa arnalǵan oblystyq perınataldyq ortalyq saltanatty túrde ashyldy. Densaýlyq saqtaý nysany 4 qabattan turady. Munda áıelder men jańa týǵan nárestelerge neonatologııa, anestezıologııa, reanımatologııa, akýsherlik jáne gınekologııa mamandyqtary boıynsha qyzmet kórsetiledi. Ana men bala ortalyǵy jańa zamanaýı medısınalyq qural-jabdyqtarmen qamtamasyz etilgen. Ǵımaratta 80 tósek týý bólimine arnalsa, onyń 12-si jeke bosanatyndar men 10-y reanımasııa bólimine arnalǵan. Al júkti áıelder úshin 35 tósek qarastyrylsa, nárestelerge 50 oryn, gınekologııa bólimine 35 jatyn oryn berilip otyr. Sondaı-aq, ortalyqta keńes berý dıagnostıkalyq emhanasy da jumys jasamaq. Bul óz kezeginde otbasy josparlaý, genetık, gınekolog-endokrınolog, jatyr moınynyń patologııasy jáne túsik qaýpiniń aldyn alýǵa arnalady. Aldaǵy ýaqytta munda qoldan uryqtandyrý men genetıkalyq ortalyqtardyń ashylýy da josparda bar. Ortalyqtyń neonataldy hırýrgııasynyń damýy da bir júıege keltirilmek.
– Aımaǵymyzda halyq densaýlyǵyn jaqsartýda ilkimdi ister atqarylýda. Ásirese, ana men bala ólimin azaıtýǵa aıryqsha mán berip otyrmyz. Nátıje bar. О́ńir tabıǵı ósim boıynsha respýblıkada aldyńǵy qatarda tur. Sondyqtan mundaı ortalyqtyń oblys úshin mańyzy zor. Eń bastysy bul nysan bas qalamyz Astana kúni qarsańynda paıdalanylýǵa berildi. Bul Syr eliniń bas qalamyzǵa tartýy,– dedi oblys ákimi Qyrymbek Kósherbaev.
Sońǵy 2 jylda Qyzylorda oblysynda ana ólimi 30 paıyzǵa, sábıler ólimi 27 paıyzǵa tómendedi. Al 3 jylda óńirde 39 medısınalyq nysan paıdalanylýǵa berilse, bıyldyń ózinde 18 densaýlyq saqtaý mekemesi ashylady dep josparlanýda.
Jańadan paıdalanylýǵa berilgen perınataldy ortalyq ana men balaǵa kómek kórsetetin barlyq emdeý, saýyqtyrý, aýrýdyń aldyn alý uıymdarynyń úılestirýshisi bolady. Bul jerde mamandar daıarlanyp, ózara tájirıbe almasady.
– Respýblıka boıynsha dál osyndaı 21 ortalyq bar. Munda jumys jasaıtyn 14 neonatolog, 7 reanımator mamandar arnaıy daıarlandy. Jalpy, elimizde bosanýdyń ortasha kórsetkishi 23,3 paıyz bolsa, Syr elinde atalǵan kórsetkish 28 paıyzdy qurap otyr,– dedi Densaýlyq saqtaý mınıstrligine qarasty «Akýsherııa, gınekologııa jáne perınatologııa» ǵylymı ortalyǵynyń dırektory Talǵat Qudaıbergenov.
Ana men bala ortalyǵynda 100-ge jýyq dáriger qyzmet jasasa, 204 orta býyn jáne 193 kishi býyn qyzmetkerleri jumys isteıtin bolady. Shtattyq birliktiń 110 orny ákimshilik pen sharýashylyq bólimine qarastyrylǵan.
Erjan BAITILES,
«Egemen Qazaqstan».
QYZYLORDA.