Tarıhı jady myqty, óziniń ulttyq negiziniń qaıdan bastaý alatynyn biletin suńǵyla halyq zaman aǵymy, qoǵam baǵyty qalaı ózgerse de ata-baba saltyn, mádenıetin, murasyn zamanǵa saı jańartyp, jańǵyrtyp otyrady.
Ultymyzdyń qundylyqtaryn laıyqty dáripteı bilýdiń bir kórinisi retinde bizdiń oblystyq balalar jáne jasóspirimder kitaphanasynda «Saq – etnomádenı ortalyǵy» ashyldy. Bul ortalyq túrki halyqtarynyń tarıhynan, onyń bir tarmaǵy bolyp keletin qazaq halqynyń oıyndarynan, mádenıetinen, ónerinen habar berip, balalardy ulttyq salt-dástúrge sýsyndatpaq. Tek qana ulttyq oıyndarmen shektelmeı, tanym kókjıegin keńeıtetin kitaptar nasıhattalyp, ártúrli pikirtalastar uıymdastyrylady, ǵylymı jobalar jasalady.
Jańa ortalyqtyń tusaýkeser rásimine zııaly qaýym ókilderi kelip, jyly lebizderin bildirdi. Sondaı-aq shejireshi, qolóner sheberi Dúısen Shókenuly ózi jasaǵan zattardy kórmege ákelip, qamshy órý, ertoqym, kıizúıdiń jasalý joldaryn kórsetti.
«Qońyr: ún, til, dil» atty ınstallıasııalyq kórme arqyly qatysýshylar qazaq halqynyń baǵzy zamandaǵy syr men muńǵa toly áýezderin tyńdap, ánshiler men kúıshiler týraly tolyq maǵlumat aldy.
Ortalyqty ashýdaǵy maqsat – jas óskinderdi halqymyzdyń salt-dástúrimen, nárli taǵamdarymen, oralymdy oıǵa baı maqal-mátelderimen tanystyrý, sadaq atý, láńgi tebý, asyq atý syndy oıyndardy qumary qanǵansha oınatý. Sonymen qatar «Saq etnomádenı ortalyǵy» qazaq halqynyń ǵana emes, baýyrlas túrki halyqtarynyń tynys-tirshiligi men salt-dástúrinen mol maǵlumat beredi.
Kitaphanamyzda ashylyp jatqan ortalyq qoǵamda bala tárbıesine qatysty olqylyqtardyń ornyn toltyryp qana qoımaı, jas jetkinshekterge rýhanı azyq beredi degen oıdamyz. Ortalyqtyń jumysy 16 mamyr aıynan bastap úzdiksiz jumys isteı bastady.
Roza BEKEJANQYZY,
Shyǵys Qazaqstan oblystyq balalar jáne jasóspirimder kitaphanasynyń qyzmetkeri