Eýrazııa ulttyq ýnıversıtetinde Ońtústik Afrıka men Qazaqstan arasyndaǵy dıplomatııalyq qatynastardyń ornaǵanyna 31 jyl tolýyna oraı resmı is-shara ótti, dep habarlaıdy Egemen.kz.
Is-sharaǵa dıplomattar, halyqaralyq uıymdardyń ókilderi, ǵalymdar men oqytýshylar qatysty.
«Mundaı is-sharany EUÝ qabyrǵasynda ótkizý qos el arasyndaǵy yntymaqtastyq pen ózara túsinistikti damytýda bilim jáne ǵylym salasynyń orasan zor rólin aıqyndaıdy. Búgin seriktesterimizben birge ózara yntymaqtastyqty keńeıtýdiń jáne ǵylymı-akademııalyq yntymaqtastyq sheńberinde jańa jobalardy iske asyrýdyń tamasha múmkindigi týyp otyr. Búgingi jıyn ǵylym men bilim salasyndaǵy ekijaqty qarym-qatynastardy damytýǵa jańa serpin beredi degen senimdemin», dep atap ótti L.N.Gýmılev atyndaǵy EUÝ rektory Erlan Sydyqov.
Kezdesý barysynda Ońtústik Afrıka Respýblıkasy Halyqaralyq qatynastar jáne yntymaqtastyq mınıstriniń orynbasary Kandıt Mashego-Dlamını Afrıka men Qazaqstannyń dıplomatııalyq qatynastarynyń damýy týraly egjeı-tegjeıli aıtyp berdi.
«Bul shynymen de mańyzdy oqıǵa. Biz Qazaqstannyń halyqaralyq qoǵamdastyqqa qosqan úlesin jáne onyń kópjaqty máselelerdegi rólin atap ótkimiz keledi. Biz qazirgi jahandyq saıası jáne ekonomıkalyq arhıtektýranyń qundylyqtary men salystyrmaly kózqarastaryn talqylap, jańalyqtardy bólisemiz. Biz eki tarap arasyndaǵy bolashaq qarym-qatynastar budan da serpindi bolatynyna úmit artamyz, ásirese bizdiń qarym-qatynastarymyzdyń ekonomıkalyq aspektileri yntymaqtastyqtyń úlken áleýetin kórsetedi», dep qorytyndylady Kandıt Mashego-Dlamını.
Is-sharaǵa Syrtqy ister mınıstriniń orynbasary Qanat Tumysh ta qatysyp, sharanyń mańyzdylyǵyn atap ótti.
«Búgingi is-sharaǵa erekshe kóńil bólip, úlken mán bergenderińizge asa qýanyshtymyz. Eki eldiń dıplomatııalyq qarym-qatynastarynyń kelesi 30 jyldyǵy bizdiń yntymaqtastyǵymyzdyń altyn kezeńi bolatynyna senimdimiz. Ońtústik Afrıkanyń uly kóshbasshysy, alǵashqy demokratııalyq prezıdenti Nelson Mandelanyń: «Eger siz bizdiń planetamyzdy ózgertkińiz kelse, bilim – eń kúshti qarý» degen sózi bar. Sondaı-aq uly fılosof Ál-Farabı: «Eger siz ulttyń bolashaǵyn kórgińiz kelse, onyń jastaryna qarańyz», dep aıtqan edi. Osy týrbýlenttilik kezeńinde biz baýyrlastyq, mahabbat, meıirimdilik qasıetterin saqtaýymyz kerek. Tabysty urpaǵymyz úshin jaqsy álem quraıyq», dedi Qanat Tumysh.
Ońtústik Afrıkanyń Qazaqstan Respýblıkasyndaǵy Tótenshe jáne О́kiletti Elshisi Kııtýmetsı Mettıýs birlesken jobalardy júzege asyrý maqsatynda qoldaý kórsetkeni úshin EUÝ rektory men ýnıversıtet qyzmetkerlerine alǵys bildirdi.
Erlan KIIKBAI,
L.N.Gýmılev atyndaǵy EUÝ stýdenti