Qazalydaǵy R.Baǵlanova atyndaǵy mádenıet ortalyǵynda kúıshi, qobyzshy, mýzykant Mahambet jáne Romanqul Áýezovter atyndaǵy «Qasterlep júrsin ónerińdi urpaǵyń» atty respýblıkalyq dástúrli otbasylyq ansamblder baıqaýy ótti.
Taraz, Atyraý, Aqtóbe qalalary men Aral, Shıeli, Syrdarııa aýdandarynan kelgen halyqtyq otbasylyq ansamblder músheleri aldymen «Áýezovter» halyqtyq otbasylyq ansambliniń 45 jyldyǵyna arnalǵan kórmemen tanysty. Baıqaýdyń ashylý saltanatynda aýdan ákiminiń mindetin atqarýshy Kúntiles Nazymbekov qatysýshylarǵa sáttilik tiledi. Ujymnyń aımaqtaǵy óner kóshine qosylǵanynyń 45 jyldyǵyna oraı jaryq kórgen «О́nerimen órkendegen áýlet» atty kitaptyń tusaýkeseri ótti.
Ansamblder ónerine «Mádenıet salasynyń úzdigi» tósbelgisiniń ıegeri, kúıshi-qobyzshy Arman Áýez, Qazaqstan Kompozıtorlar odaǵynyń múshesi, Mádenıet qaıratkeri Sáýken Álish, Qazanǵap atyndaǵy joǵary mýzykalyq kolledj oqytýshysy Tólegen Kádenov, Shymkent saz kolledjiniń oqytýshysy, belgili mýzykant Kosmonavt Aıýbaev, bilim salasynyń ardageri, qobyzshy Erpazyl Júsip qazylyq etti.
Aýdanda ótken baıqaýdyń bas júldesi Aqtóbe qalasynan kelgen «Shashý» halyqtyq otbasylyq ansambline buıyrdy. Birinshi oryndy syrdarııalyq Sádýaqasovtar, ekinshi oryndy Atyraý qalasynan kelgen Qarabalınder, úshinshi oryndy Taraz qalasynan qatysqan Jańabaevtar halyqtyq otbasylyq ansambli ıelendi. Arnaıy júlde Aral aýdanynan kelgen Qadyrqulovtar otbasyna tabystaldy.
Qyzylorda