Qazaqstan Respýblıkasynyń Parlamentine
“Nur Otan” halyqtyq-demokratııalyq partııasynyń
Saıası bıýrosyna
Qymbatty qazaqstandyqtar!
Qurmetti Senat jáne Májilis depýtattary!
Qadirli “Nur Otan” halyqtyq-demokratııalyq partııasyndaǵy serikterim!
Barshańyz bilesizder, meniń aldyma Tuńǵysh Prezıdent, El Basy týraly zańnamaǵa ózgerister men tolyqtyrýlar engizý týraly elimizdiń Parlamenti qabyldaǵan zańdar kelip tústi. Eń áýeli, maǵan zańdy turǵydan El Basy degen resmı mártebe belgilegeni úshin depýtattarǵa zor alǵys aıtamyn. Osy mártebeni qabyldaý týraly tilek aıtyp, on myńdaǵan hat joldaǵan otandastaryma – kóp ultty Qazaqstannyń azamattaryna shyn júrekten rızashylyq bildiremin. Elimizdegi turaqtylyqty odan ári nyǵaıtý maqsatynda Parlament atalǵan sheshimdi biraýyzdan qabyldady. Bul ystyq yqylasty maǵan degen qaltqysyz senimniń kórinisi dep baǵalaımyn. Muny tarıh úshin tym qysqa ýaqyt aralyǵynda, táýelsizdik jyldarynda múmkin emesti júzege asyrǵan, myzǵymas shekarasy halyqaralyq deńgeıde moıyndalǵan, baıtaq Astanasy kókpen talasyp boı kótergen, kúıregen ákimshilik júıeni ózgertip, ótpeli kezeńde kúızelisten aman shyqqan, álemdik tájirıbege súıene otyryp naryqtyq ekonomıkanyń ózindik qazaqstandyq úlgisin qalyptastyrǵan elimizdiń eren eńbeginiń elenýi dep bilemin. Biz saıası turaqtylyqty saqtap, azamattyq álem men toleranttylyqty, ultaralyq jáne konfessııaaralyq kelisimdi basty ǵumyrlyq qundylyq retinde ulyqtap, nyǵaıtyp kelemiz. Bizdiń elimiz ustanǵan aıqyn baǵytymen, ekonomıkalyq reformalardyń qarqyny jáne tıimdiligimen, ózara áriptestikke jáne aýqymdy ıntegrasııaǵa negizdelgen seriktestikke umtylysymen, izgilikke qushtarlyǵymen álemdik qaýymdastyqtan laıyqty oryn aldy. Bizdiń ıadrolyq qarýdan bas tartý jáne jahandyq jappaı qarýsyzdaný týraly bastamalarymyzdy barlyq elder, Birikken Ulttar Uıymy qyzý qoldap, ony ǵalamshardyń qaýipsizdigi jolyndaǵy kúrestiń kóshbasshylary qataryndaǵy Qazaqstannyń álemdik serpilisi retinde tanydy. Men kúrdeli kezeńde eldiń kóshin bastaý qurmetine ıe boldym. Sonda sizderdiń naqty qoldaýlaryńyzdy, ynta-jigerlerińizdi, qajyr-qaırattaryńyzdy árdaıym aıqyn sezindim. Bul – orasan baqyt. Budan ózge maǵan eshteńe qajet emes. Boıdaǵy qýat, bilik pen tájirıbe múmkindik berse, men halqym júktegen qasterli mindetti oryndaý maqsatynda áli de qajymaı qyzmet ete beremin. Eń bastysy – kúrdeli kezeńde bıliktiń bastamalaryn halyqtyń qapysyz túsinýi men ony qaltqysyz qoldaýy. Mysaly, jahandyq qarjy daǵdarysynan biz jańa ıdeıalar arqyly tyń josparlar jasap, shynyǵyp shyǵyp kelemiz. Qymbatty otandastar! Tek turaqty jáne gúldengen el ǵana ózge memleketter men halyqaralyq uıymdardyń jaýapkershiligi mol laıyqty seriktesi bola alady. Biz osyǵan qol jetkizdik. Qazir biz 2020 jylǵa deıingi Strategııalyq damý josparyn jáne Qazaqstannyń ınnovasııalyq-tehnologııalyq damý baǵdarlamasyn júzege asyrýǵa kiristik. Eldi Indýstrııalandyrýdyń kartasy ázirlendi. Jalpy alǵanda, ekonomıkany tehnologııamen jabdyqtandyryp, ony ınnovasııalyq damýdyń arnasyna baǵyttaý, sapaly jańa óndiris oryndary men ǵylymı ortalyqtar ashý, adam múmkinshiliginiń sapasyn kóterý sııaqty ulan-ǵaıyr mindetter belgilendi. Oıǵa alǵan isterdiń barlyǵynyń oryndalaryna meniń senimim kámil. Alaıda, tek turaqty elde ǵana azamattardyń teń quqyq pen múmkinshilikpen, laıyqty jumyspen, árbir otbasynyń molshylyq jáne jarqyn bolashaqpen qamtamasyz etile alatynyn este saqtaǵan abzal. Biz sondyqtan jaqsylyqqa bel alǵan dáýirge degen halyqtyń senimi nyǵaıa túsýi úshin bárin jasaýǵa tıispiz. Biz birge osylaı jumyla tússek, kez kelgen qıyndyqty eńseretinimizge kámil senemin. Men qoǵamdyq pikirde berik qalyptasqan “El Basy” mártebesin zańdastyrý týraly Parlamenttiń sheshimin túsinistikpen qabyldaımyn. Áleýmettik zertteýler búginde Qazaqstan halqynyń basym kópshiligi osy ıdeıany qoldaıtynyn kórsetip berdi. Sondyqtan, men eńbegimdi baǵalap, qoldaý bildirgenderi úshin qazaqstandyqtarǵa shynaıy alǵysymdy bildiremin. Sonymen qatar men El Basy mártebesin tek zańdarmen, dekrettermen nemese ózge de quqyqtyq aktilermen belgileýge bolmaıdy dep esepteımin. Memleket basshysyna qosymsha ókilettikter berý týraly mundaı tájirıbeler álemdik qoldanysta az emes. Bizdiń taıaýdaǵy tarıhymyzda mundaı jaǵdaı buryn bolǵan, men onda reformalardy pármendi júrgizý úshin qosymsha ókilettikter suraǵan edim. Ol ýaqytta bul bizdiń elimizdiń postkeńestik kezeńdegi kúızelisten shyǵýynda sheshýshi faktor boldy. Eger bolashaqta eldiń damýy men azamattardyń qaýipsizdigine, memlekettiń tutastyǵy men ulttyń múddesine qater tóndiretin almaǵaıyp zaman týsa, men qosymsha ókilettikter suraımyn jáne bultartpas dálelder arqyly halyqtyń qoldaýyna tolyq ıe bolaryma kúmánim joq. Barshańyz bilesizder, maǵan qarata aıtylǵan barlyq madaqqa, meniń jeke tulǵamdy aıryqsha ulyqtaıtyn usynystarǵa men úzildi-kesildi tyıym salyp kelemin. Men is basyndaǵy Prezıdent retinde osy másele tóńiregindegi teńgege beıne tańbalaý, túrli ataqtar sııaqty bekershilikke árdaıym qarsy boldym. Men árqashan túrli maqtaý men madaqtan bıik turýǵa tyrysamyn jáne osy ustanymymda qala beremin. Prezıdenttiń ar-namysyn jáne derbes quqyǵyn qorǵaý týraly usynylyp otyrǵan másele jóninde. Bular el Konstıtýsııasynda, Prezıdent, Tuńǵysh Prezıdent týraly zańdar men ózge de zańnamalyq aktilerde sheshimin tapqan. Meniń otbasymnyń músheleri týraly. Olar, ózge azamattar sııaqty tańdaǵan mamandyqtary boıynsha eńbek etýge nemese qoǵamdyq-saıası qyzmetter atqarýǵa jáne bıznespen aınalysýǵa quqyly. Sonymen qatar barsha qazaqstandyqtar sııaqty, el azamattaryn teńestiretin buljymas Zańǵa baǵynýy tıis. Burynǵy kúıeýbalam, úsh nemeremniń ákesi R.Álıevtiń shekten shyǵý arqyly tek óz otbasyn, balalaryn, meni ǵana emes, tutas eldi satyp ketýi – maǵan jáne meniń otbasyma orasan qasiret boldy. Bul jaǵdaıdy men jáne týystarym qaıyspaı qarsy alyp, oǵan shyǵarylǵan sottyń sheshimin ádil úkim retinde qabyldadyq. Basqasha bolýy múmkin emes edi. Bul tek meniń jaqyndaryma ǵana emes, memleketimizdegi bılik basynda júrgen barsha azamattar úshin qatań sabaq boldy. Táýelsizdik jyldary biz sizdermen birge órkenıetti álemniń ólshemi men dástúrlerine sáıkes erkin, zaıyrly, quqyqtyq memleket qurýdamyz. Biz osy jolda qol jetkizgen tabystarymyz arqyly jetekshi halyqaralyq uıymdar men ıntegrasııalyq qurylymdardyń zor qurmetine ıe boldyq. Barshańyz bilesizder, Qazaqstan Eýropadaǵy Qaýipsizdik jáne yntymaqtastyq uıymynyń is basyndaǵy Tóraǵasy bolyp tabylady, óńirlik birqatar uıymdarǵa basshylyq jasaýda. Biz osy senimniń údesinen shyǵyp, abyroıly mindetti laıyqty atqarýǵa tıispiz. Joǵaryda aıtylǵan jaǵdaılarǵa baılanysty, qurmetti Senat jáne Májilis depýtattary, maǵan jiberilgen zańdarǵa qol qoıýdan bas tartý jónindegi ustanymymdy durys túsinýlerińizdi ótinemin. Qazaqstan Respýblıkasynyń Prezıdenti Nursultan NAZARBAEV. 3 maýsym 2010 jyl