Qazaqstan Respýblıkasynyń Prezıdenti janyndaǵy Qazaqstannyń strategııalyq zertteýler ınstıtýty (QSZI) Astana qalasynda Ortalyq Azııadaǵy qaýipsizdik jáne yntymaqtastyq forýmynyń alańynda álemniń 25 elinen tanymal zııaly qaýym ókilderin jınaıdy, dep habarlaıdy Egemen.kz.
13-14 shilde aralyǵynda «О́zgermeli álemdegi Azııa: bolashaqtyń kún tártibi» taqyrybynda Ortalyq Azııa forýmy ótedi.
Álem buryn-sońdy bolmaǵan kúrdeli geosaıası ózgeristerdiń aldynda tur. Údemeli sıpattaǵy jahandaný aıasynda aımaqtandyrýdyń jańa formattary qatar artyp keledi. Munyń bári qaýipsizdik arhıtektýrasyn qosa alǵanda, halyqaralyq qatynastardyń jańa erejeleri men tetikterin ornatýda básekelestiktiń kúsheıýin týdyrady. Bul turǵyda Azııa saıası jáne geoekonomıkalyq tartymdylyqtyń negizgi ortalyǵy mártebesine ıe bolady. Sondyqtan Qaýipsizdik jáne yntymaqtastyq forýmy «О́zgermeli álemdegi Azııa: bolashaqtyń kún tártibi» taqyrybyna arnalady.
Is-shara Mıýnhen qaýipsizdik konferensııasy, IISS-Shangri La Dialogue, Raisina Dialogue, Prımakov oqýlary jáne Astana Halyqaralyq forýmy sııaqty jyl saıynǵy alańdardyń jahandyq ekojúıesiniń bóligi bolmaq. Forým álemniń jetekshi ǵylymı-zertteý ortalyqtarynyń kórnekti oıshyldary men saıasattanýshylarynyń dıalogy men ózara is-qımylynyń jańa formattaryn kórsetedi. Jıyn Syrtqy ister mınıstrligimen birlesip uıymdastyrylady.
Pikirtalas taqyryptary: «Azııanyń jahandyq qaýipsizdigi: bolashaq múmkindikteri», «Eýrazııanyń jańa kontınenttik ózara baılanystylyǵy: orta dáliz jáne ıntegrasııa dıalogy», «Innovasııalar men «aqyl-oı» úshin jahandyq básekelestik: jańa tehnologııalar, jasandy ıntellekt jáne adamı kapıtal» jáne t.b. Japonııa, Qytaı, AQSh, Úndistan, Sıngapýr, Reseı, Túrkııa jáne ózge elderdiń ókilderiniń qatysýy kútiledi.
Spıkerler qatarynda BUU Bas hatshysynyń orynbasary, BUU Kontrterrorıstik basqarmasynyń basshysy Vladımır Voronkov, Eýropalyq Odaqtyń Ortalyq Azııa boıynsha arnaıy ókili Terhı Hakala, Japonııanyń Ulttyq saıası zertteýler ınstıtýtynyń vıse-prezıdenti Narýshıge Mıchıshıta, Syrtqy ister mınıstriniń orynbasary, Iran SIM Saıası jáne halyqaralyq zertteýler ınstıtýtynyń prezıdenti Mýhammad Hasan Sheıh Ál Islamı, Katardaǵy Djordjtaýn ýnıversıtetiniń memlekettik saıasat professory, Arab zertteýler jáne saıası zertteýler ortalyǵynyń ırandyq zertteýler bóliminiń bastyǵy Mehran Kamrava jáne t.b. bar.