Qazaqstanda tamyzdyń alǵashqy jeksenbi kúni otandyq kólik salasynyń qyzmetkerleri ózderiniń kásibı merekelerin atap ótedi. Osyǵan baılanysty QR Indýstrııa jáne ınfraqurylymdyq damý mınıstrliginde saltanatty is-shara uıymdastyrylyp, eren eńbegimen kózge túsken sala mamandaryna qurmet kórsetildi, dep habarlaıdy Egemen.kz.
Kásibı merekeniń qarsańynda Qazaqstannyń kólik salasynyń ókilderin vedomstvo basshysy quttyqtap, qaltqysyz qyzmet etken jandarǵa memlekettik nagradalardy, sondaı-aq mınıstrliktiń atynan qurmet gramotalar men alǵys hattardy tabystady.
Mınıstr aıtqandaı, jol ekonomıkanyń kúretamyry sanalady. Al onyń boıyna qan taratyp, salanyń damyl tappaı damýyna atsalysatyn birden-bir tulǵalar - kólik sektorynyń mamandary. Sondyqtan da strategııalyq turǵyda mańyzdy baǵyttyń úzdiksiz jumysyn qamtamasyz etip otyrǵan azamattardyń eńbegi qashan da qurmetke laıyq.
«Bıyl Kólik baqylaý ınspeksııasynyń qurylǵanyna 30 jyl toldy. Egemendik kezeńinen bastap, elimizdiń kólik salasynda qyrýar jumys atqaryldy. Aıtalyq, Qazaqstan óńirlik logıstıkalyq hab pen tranzıttik áleýeti damyǵan elge aınaldy.
Qazir atalǵan salada 400 myńnan astam adam jumyspen qamtylyp, kólik sektory ekonomıkanyń qozǵaýshy kúshine aınalyp otyr. Búgin kólik baqylaý salasy jańa 18 jyljymaly baqylaý beketimen tolyqtyryldy. Bul óz kezeginde avtojoldardy qalypty deńgeıde saqtap, belgilengen talaptardyń oryndalýyn baqylaýǵa múmkindik beredi», dedi Indýstrııa jáne ınfraqurylymdyq damý mınıstri Marat Qarabaev.
Saltanatty jıynda IIDM basshysy birqatar azamatty arnaıy nagradamen marapattady. Atap aıtqanda, «Eńbek ardageri» medali Jumabaı Sábıev pen Baýrjan Áshimovke tabystaldy. Sonymen qatar «Qurmetti temirjolshy» belgisi Arnur Dinahmet jáne Danııar Nýrekeshovke berildi. «Qurmetti avtokólikshi» tósbelgisimen Hazmahamet Týmgýev pen Jumabek Isataev nagradtaldy. Al «Úzdik avtokólikshi» tósbelgisine Boranbaı Tólegenov jáne Nurlan Sarsenbekov ıe boldy. Budan bólek eki qyzmetker mınıstrdiń qurmet gramotasy men úsh adam alǵys hatpen marapattalǵanyn aıta ketý kerek.