Keıingi jyldary elimizdiń jas tennısshileri halyqaralyq iri tennıs týrnırlerinde úzdikter qatarynan kórinip, jarys jeńimpazy atanyp júr.
Máselen, ótken aptada Belgııanyń Hasselt qalasynda ótken jasóspirimder arasyndaǵy eń kóne «Young Champions Cup» týrnırinde 14 jastaǵy otandasymyz Eva Korysheva jarys jeńimpazy atandy.
Aqtóbe tennıs mektebiniń tárbıelenýshisi mańyzdyń týrnırdiń fınaldyq básekesinde túrkııalyq tennısshi Zýmra Balkanmen sheberlik baıqasyp, eki sette - 6:2, 7:5 esebimen qarsylasynan basym tústi. Sondaı-aq jerlesimiz týrnırdiń jartylaı fınalynda osy jarystyń 5-raketkasy retinde tirkelgen polshalyq Barbara Kochetkany 6:3, 7:6 esebimen jeńse, shırek fınalda álemniń 18-shi, osy jarystyń úshinshi raketkasy horvatııalyq Anna Petkovıchti úsh sette 6:4, 4:6, 6:1 esebimen jarys jolynan yǵystyrǵan.
«Eýropadaǵy eń bedeldi týrnırlerdiń birinde jeńiske jetkenime áli de sene alar emespin. Dese de jaqsy nátıjege qol jetkizýge bolatynyn túsindim. Biraq siz tıtýl týraly eshqashan aldyn ala oılamaısyz. Belgili bir match, maqsatqa birte-birte qadam basyp kele jatyrmyn, bapkerime jáne maǵan sengenderdiń barlyǵyna alǵys aıtqym keledi», dedi Eva Korysheva fınaldan keıin.