Memlekettik qyzmet isteri agenttigi Prezıdenttiń keıbir jarlyqtaryna memlekettik qyzmetshilerge, quqyq qorǵaý organdarynyń qyzmetkerlerine jáne áskerı qyzmetshilerge oıyn mekemelerine barýdan bas tartýǵa nusqaý bergen túzetýler jobasyn ázirledi, dep habarlaıdy Egemen.kz.
Bılik ókilderiniń oıyn mekemesine barý faktisi qoǵam tarapynan negizdelgen syn týdyrady. Olarǵa joǵary talaptar qoıylǵan, olar azamattardyń aldynda memlekettik bıliktiń qadir-qasıeti men bedeline nuqsan keltiretin áreketterge jol bermeýi kerek.
«Qyzmettik ádep normalarynyń talaptaryn saqtaý sheńberinde áskerı qyzmetshilerdi, memlekettik qyzmetshilerdi jáne quqyq qorǵaý organdarynyń, azamattyq qorǵaý organdarynyń jáne memlekettik qyzmetshilerdiń «Oıyn bıznesi týraly» zańda kózdelgen uıǵarymǵa jatatyn oıyn mekemesine barýdan bas tartýǵa yntalandyrýǵa baǵyttalǵan usynymdyq sıpattaǵy normalardy engizý usynylady», delingen túsindirme jazbada.
Dese de memlekettik qyzmetkerler men quqyq qorǵaý organdarynyń qyzmetkerleri qyzmettik qajettilik týyndaǵan jaǵdaıda kazınoǵa bara alady. Al áskerı qyzmetshiler úshin erekshelikter qarastyrylmaǵan.
Joǵaryda atalǵan jobaǵa sáıkes Prezıdenttiń úsh jarlyǵyna ózgerister engizý kózdelgen. Olar:
«Qazaqstan Respýblıkasy Qarýly Kúshteriniń, basqa da áskerleri men áskerı quralymdarynyń jalpyáskerı jarǵylaryn bekitý týraly»; «Qazaqstan Respýblıkasy memlekettik qyzmetshileriniń ádep normalary men minez-qulyq qaǵıdalaryn odan ári jetildirý jónindegi sharalar týraly»; «Qazaqstan Respýblıkasynyń Quqyq qorǵaý organdary, azamattyq qorǵaý organdary jáne memlekettik feldegerlik qyzmet qyzmetkerleriniń Ádep kodeksin bekitý týraly».Joba 28 tamyzǵa deıin «Ashyq NQA» portalynda jarııa talqylaý úshin ornalastyrylǵan.
Karıma JUMAǴALI,
Qorqyt ata atyndaǵy Qyzylorda ýnıversıtetiniń stýdenti