Jýyrda Qonaev qalasynda «Qazaqstannyń úzdik taýary» óńirlik baıqaýy uıymdastyryldy. Sondaı-aq is-shara aıasynda «Bir aýyl – bir ónim» jobasyna qatysýshylarynyń kórmesi ótti. Ortalyq alańda ótken is-sharaǵa 80-ge jýyq kásipker qatysty. Kórmeni tamashalaı kelgen qonaqtar taýarlardy óndirýshilerden óz baǵasyna satyp alý múmkindigine ıe boldy.
Is-sharanyń saltanatty ashylýynda Almaty oblysy kásipkerler palatasynyń basqarýshy dırektory Erjan Dúısekenov baıqaýdyń maqsaty kásiporyndardyń qyzmetin jandandyrý, otandyq taýarlardyń sapasyn arttyrý jáne el naryǵyn básekege qabiletti ónimmen tolyqtyrý ekenin atap ótti. Sondaı-aq ol osy kórme arqyly óńirdiń jeke brendterin qurý, marketıng jáne naryqtaǵy ónimniń qundylyǵyn arttyrý jolynda ter tógip júrgen otandyq kásipkerlerdiń eńbegine tolaǵaı tabys tiledi.
Kelesi kezekte Almaty oblysy ákiminiń orynbasary Rýstam Isataev dástúrli túrde ótkizilip kele jatqan osy baıqaý arqyly halyq arasynda sapa ıdeıasy keńinen tanylyp, elimizdiń naryǵy básekege qabiletti ónimdermen tolyǵa túsetinin tilge tıek etti.
«Keıingi bes jylda kásippen aınalysýshylardyń óńir ekonomıkasyn damytýǵa qosqan úlesiniń nátıjesinde ónerkásip kólemi eki esege artyp, ótken jyldyń qorytyndysy boıynsha 1,6 trln teńgeni qurap, 2021 jylǵy kórsetkishten 300 mlrd teńgege ósip otyr. Búginde oblysta 120 myńnan asa shaǵyn jáne orta bıznes sýbektileri jumys isteıdi. 2050 jylǵa deıingi damý strategııasy sheńberindegi negizgi maqsattyń biri – shaǵyn jáne orta bıznestiń úlesi eldiń ishki jalpy óniminiń keminde 35 paıyzyn qamtamasyz etý. Kásipkerlikti damytý jónindegi ulttyq joba sheńberinde halyq tutynatyn taýarlardyń otandyq óndirisin qoldaý maqsatynda «Kásipkerlikti damytýdyń 2022 jylǵa arnalǵan ulttyq jobasy» aıasynda 18,8 mlrd teńgeniń jobalary qarjylandyryldy. Shaǵyn jáne orta bıznesti damytýǵa baǵyttalǵan qoldaý 250 myńnan asa adamdy nemese ekonomıkalyq belsendi halyqtyń 26 paıyzyn jumyspen qamtyp otyrǵan óńir ekonomıkasynyń damýyna orasan zor mýltıplıkatıvti áser beredi», dedi oblys ákiminiń orynbasary.
«Bir aýyl – bir ónim» aýyl turǵyndarynyń ál-aýqatyn jáne kásipkerlerdiń kirisin arttyrý, bir aýyldy básekege qabiletti bir ónim shyǵara alatyndaı deńgeıge jetkizý úshin qolǵa alynǵan joba ekenin atap ótken oblystyq «Atameken» kásipkerler palatasyna qarasty isker áıelder keńesiniń tóraıymy Lázzat Botabekova óz ónimderin kópshilik nazaryna usynǵan kásipkerlerge sáttilik tileı otyryp, kásibin dóńgeletip júrgen barsha áıelder qaýymyna qoldaý bildiretinin ashyp aıtty.
О́z kezeginde óńirlik kásipkerler keńesiniń tóraǵasy Erik Ábıtov te memleket tarapynan kásipkerlikti damytýda birqatar baǵdarlamanyń baryn atap, oǵan oblys ákimi Marat Sultanǵazıevtiń únemi qoldaý kórsetetini úshin rızashylyǵyn bildirdi.
Is-sharaǵa qatysqan qonaqtar nazaryna Súıinbaı atyndaǵy oblystyq fılormonııa ónerpazdarynyń konserttik baǵdarlamasy usynyldy. Otandyq ónimderdiń san túri tanystyrylǵan kórmede ózinshe órnegimen kózge túsken aýdandar az bolmady. Aıtalyq, Jambyl aýdanynan arnaıy at arytyp kelgen kórme qonaqtaryn batyr jaýyngerler men ulttyq kıimdegi kórikti qyzdar qarsy alsa, Qarasaı óńirinen kelgen qonaqtardy qos ishekti dombyra shertken dýet jyr-shashýmen qarsy alyp jatqan kórinister kóńilge qýanysh sebeledi.
Quramyna jergilikti bılik pen qoǵamdyq uıymdardyń ókilderi, oblystyń óńirlik keńesi men kásipkerler palatasynyń músheleri kirgen arnaıy komıssııa úzdik taýarlardy «Úzdik ónerkásip taýarlary» jáne «Úzdik azyq-túlik taýarlary» atalymy boıynsha anyqtady.
Komıssııa quramynyń sheshimine sáıkes «IT&M» kompanııasy «Úzdik ónerkásip taýarlary» atalymynyń jeńimpazy atandy. «IT&M» JShS – Qazaqstan aýmaǵynda «Misot-Flex» markaly sıntetıkalyq penoplast shyǵaratyn jelini iske qosqan alǵashqy kompanııa.
Ekinshi oryndy ınnovasııalyq molekýlalyq tehnologııalardy qoldaný arqyly ázirlengen biregeı sıntetıkalyq maılardy shyǵaratyn kompanııa «LÝKOIL Lýbrıkant Sentralnaıa Azııa» JShS ıelendi.
Mehanıkalyq beriktiktiń joǵarylaýyna jáne sáıkesinshe kabeldi qorǵaýǵa arnalǵan joǵary sapaly qubyrlarǵa kepildik beretin TMD elderindegi birinshi spıraldy qubyrlardy óndirýdiń ınnovasııalyq tehnologııalaryn paıdalanýǵa negizdelgen «Beriktigi joǵary kábildik qubyrlar zaýyty» kásiporny úzdik úshinshi orynǵa turaqtady.
Al «Úzdik azyq-túlik taýarlary» atalymynda jalǵyz jeńimpaz «AsiaAgroFood» AQ atandy.
«Biz – Qazaqstanda sıroptar, mal azyǵy jáne nan unynyń óndirisi boıynsha kóshbasshymyz. Negizgi qyzmetimiz – bıdaı dánin unǵa jáne júgeri dánin glıýkoza-maltoza sıroptaryna óńdeý, sonymen qatar mal azyǵynyń barlyq túrin óndirý. Barlyq seh pen óndiris Germanııada, Shveısarııada, Italııada jáne AQSh-ta shyǵarylǵan eń jańa, ónimdiligi joǵary jabdyqtarmen qamtylǵan. Sondyqtan eńbegimizdiń jaqsy baǵalanǵanyna rızamyz. Biz oblysymyzdy respýblıkalyq deńgeıde maqtanyshpen kórsetemiz», dep atap ótti kompanııa ókilderi.
Sondaı-aq «Qazaqstannyń úzdik taýary» baıqaýy aıasynda alǵash ret «Bir aýyl – bir ónim» jobasyna qatysýshylardyń ónimderi usynyldy.
«Bir aýyl – bir ónim» jobasy – óz ekonomıkasyn jaqsartý úshin áleýetti tabıǵı resýrstardy paıdalaný arqyly aýyldyq jerlerde ekonomıkalyq ósýdiń quraly. Aýyl turǵyndarynyń ómir súrý deńgeıin kóterý, satý jáne kiristi arttyrýǵa negizdelgen.
Kórmege qatysýshylardyń kópshiligi mundaı is-sharalarǵa alǵash ret qatysyp otyrǵandaryn atap ótti. Máselen, Raıymbek aýdanynan kelgen kásipker Kúlparqan Toqtaqyn kvınoadan emdik qara sabyn jasaýmen aınalysady eken.
«Ejelden ata-babalarymyz kvınoadan jasalǵan qara sabyndy kúndelikti ómirde qoldanǵan. Al kóne emshiler sabyn arqyly eń aýyr jaralardy emdep, tipti operasııa kezinde dezınfeksııalaýshy qural retinde paıdalanǵan», dep óz óndirisimen tanystyrdy kásipker.
Sondaı-aq Kegen aýdanynda kásipkerliktiń órisin keńeıtip otyrǵan Sanııazovtar otbasynyń saýdaǵa shyǵarǵan taza tabıǵı sary maıy men kilegeıine, qurt-irimshigine suranys artty. 2012 jyly «Sanııazov» sharýa qojalyǵyn qurǵan Kegen aýdanynyń qurmetti azamaty, aýdandyq máslıhattyń birneshe márte depýtaty bolǵan Serik Sanııazovtyń uly Nurbek pen kelini Alfııa Melisova baıyrǵy tehnologııamen sút ónimderin shyǵarýda kósh bastap tur.
«Atameken» kásipkerler palatasynan qoldaý taýyp, joǵary sapaly aıaqkıim tigýdi jolǵa qoıǵan Jambyl aýdanynyń ismeri Nurgúl Dálelhanqyzynyń ónimi de kóptiń qyzyǵýshylyǵyn týdyrdy.
Kórmede jumys toby úzdik 10 qatysýshyny tańdady. Ári qaraı osy kásipkerler týraly tolyq prezentasııalar ázirlenip, olar brend-komıtetke usynylady. Komıtet osy tizimnen úsh jeńimpazdy tańdaıdy. Olar bul jobanyń kóptegen múmkindigine qol jetkize alady. Atap aıtsaq, jyldyń sońyna deıin oqytý jáne marketıngtik qyzmetter, erekshe mańyzdy sertıfıkattar, ishki jáne álemdik naryqtarda jyljytý, brendti damytý, dızaın jasaý jáne basqa da jeńildikterdi paıdalanýǵa qol jetkizedi.
Almaty oblysy