Atyraý qalasynyń mańynda «Sasyq saı» atalatyn býlaný alańy bar. Jaıyq ózeniniń sol jaǵalaýyndaǵy sarqyndy sý quıylatyn alań 1945 jyldan beri bar. Jaqynda osy alańǵa qoqıqazdar oraldy.
«Aqjaıyq» memlekettik tabıǵı rezervaty ǵylym jáne monıtorıng bóliminiń ǵylymı qyzmetkeri Ilıa Bofonovtyń aıtýynsha, buryn qoqıqazdar Atyraý qalasynyń mańyna jaqyn kelgen emes. Mundaı jaıt óte sırek kezdesedi.
«Qazir qustardyń jyly jaqqa oralatyn kezeńi bastaldy. Osyndaı mıgrasııa kezinde qustardyń deni aıaldaıtyn sý aıdynyn izdeıdi. Atyraýdaǵy «Sasyq saı» býlaný alańy qoqıqazdardyń aıaldaıtyn ornyna aınaldy. Demek bul alańda qoqıqazdarǵa tabıǵı azyq – usaq shaıantárizdiler bar dep boljaýǵa bolady. Qazir munda ósimdikter men mıkroaǵzalardy ósiretin mıkrobıologııalyq úderis júrip jatyr», deıdi Ilıa Bofonov.
Onyń pikirinshe, «Qyzyl kitapqa» engizilgen qoqıqazdardyń qonǵanyna qaraǵanda, býlaný alańynyń ekologııalyq jaǵdaıy jaqsara bastaǵan bolýy múmkin. О́ıtkeni qoqıqaz lastanǵan sý aıdynyna qonbaıdy.
Oblystyq energetıka jáne turǵyn úı-kommýnaldyq sharýashylyq basqarmasynyń málimetine súıensek, Atyraý qalalyq ákimdigi 476 gektar aýmaqta ornalasqan býlaný alańyn qalpyna keltirý úshin jobalyq-smetalyq qujattamasyn ázirlegen. Eki jyl buryn saraptamanyń oń qorytyndysy alynǵan soń qalpyna keltirý jumysy bastalǵan.
«Jobany iske asyrýdyń birinshi jylynda topyraq tasylyp, bógetter salyndy. Arnaıy alań daıyndaldy. Tunba shógindileri jınalyp, ýchaskeler qamystan tazartyldy. Al byltyr býlaný alańy 355 myń tekshe metrden astam tunba shógindisinen tazartyldy. Bógetterdi toltyrý, tegisteý jáne tyǵyzdaý úshin ınertti materıaldar satyp alyndy. Joba boıynsha býlaný alańyn qalpyna keltirýdi jyl sońyna deıin aıaqtaý josparlanyp otyr», dep habarlady basqarma mamandary.
Atyraý oblysy