Egde adamdardyń jumysqa ornalasý múmkindigi shekteýli. Áıtse de zeınetke jasy taıap qalǵan adamdar memlekettik baǵdarlama arqyly «eki qolǵa – bir kúrek» taýyp otyr.
Bıyl óńirdegi 200-ge jýyq adam jumysqa ornalasty. Bul oraıda jasy elýden asqan adamdardyń tıimdi jumyspen qamtylýyna aıryqsha nazar aýdarylyp otyr. Qazirgi kúni aǵa býyn ózderiniń qolynan keletin jumyspen qamtylyp, zeınet demalysyna shyqqanda tolymdy zeınetaqy alý múmkindigine ıe bolyp otyr.
– «Kúmis jas» jobasy boıynsha múmkindiktiń bári ekshelip, tarazy basyna tartylǵannan keıin 189 adamdy jumysqa ornalastyrýdy josparlaǵan edik. Bul jospar 104,2 paıyzǵa oryndaldy. Bir jaqsysy, 33 adam laıyqty jumys istep, zeınet demalysyna sátti shyqty. Bizdiń ortalyq arqyly jumysqa ornalasqan adamnyń 13-i taıaý arada eńbek demalysyna shyqpaq. Olar memlekettik baǵdarlama aıasynda jasalyp jatqan qamqorlyqqa dán razy, – deıdi oblystyq Jumyspen qamtýdy úılestirý jáne áleýmettik baǵdarlamalar basqarmasynyń eńbek utqyrlyǵy ortalyǵynyń dırektory Asyl Moldııarova.
«Kúmis jas» jobasyna qatysýshylar úshin tólenetin eńbekaqynyń 70 paıyzyn ortalyq sýbsıdııalaıdy. Aqyl tarazysyna salyp qarasańyz, bul tásil – jumys berýshi úshin de kóp-kórim demeý. Ásirese zeınetke shyǵýǵa jasy taıap qalǵan adamdar úshin tıimdi.
Shyndyǵyn aıtqanda, kúsh kemip, qýat qashyp, egde tartqan adamdardyń jumysqa ornalasýy da shyrǵalań ekeni – shyndyq. Mine, osy sátte eki ıininen basqan júktiń salmaǵyn jeńildetip, oraıyn keltirý qoǵamdy izgilendire túseri daýsyz.
– Alpystan jasym asqan soń qarap qalǵanym salymdy sýǵa ketirip edi. Aýdandyq ortalyqqa júginýge týra keldi. Halyqty jumyspen qamtý ortalyǵynyń mamany bos jumys oryndaryn usyndy. Sondaı-aq «2021-2025 jyldarǵa arnalǵan kásipkerlikti damytý jónindegi ulttyq joba» jańa baǵdarlamasyna qatysýǵa usynys jasady. Nesi bar, biz jumystan qashpaımyz ǵoı. Sóıtip, qurylys salasynan qolymnan keletin jumys tabyldy, – deıdi Atbasar qalasynyń turǵyny Serikbaı Qaranoǵaev.
Adamdardyń boıynda bolashaqqa degen senim oty osyndaı qamqorlyqtyń ushqynymen laýlaıdy.
– Masyl bolǵannan óz nanyńdy adal eńbegińmen tapqan jaqsy emes pe? Osy ýaqytqa deıin jumys izdep tabanymnan taýsyldym. «Kúmis jas» baǵdarlamasy týraly kezdeısoq estigen edim. Janashyrlyǵy mol jaqsy baǵdarlama eken. El qamyn jegen osyndaı qamqorlyq bar jerde biz ózimizdi dármensiz sanamaımyz, – deıdi Kókshetaý qalasynyń turǵyny Alpysbaı Kóshimbaev.
«Kúmis jas» baǵdarlamasynyń jan jadyratarlyq sharapaty egde adamdardyń úmit otyn tutatyp, kókiregin sáýlelendirip tur.
Aqmola oblysy