Sheńgeldi aýyldyq okrýgine qarasty Qosqudyq eldi mekeninde bir myńǵa tarta tútin bar. Aýyldaǵy mekteptiń irgetasy ótken ǵasyrdyń ortasynda qalanǵan. Salynǵanyna 70 jyldan asqan eski mektepte oqyp kelgen aýyl balalary bıyl jańa bilim ordasyna kóshti.
Jańa mekteptiń salynýyna osy aýylda kindik qany tamǵan Aldabergen aqsaqaldyń nemeresi Dáýren Qanatuly uıytqy boldy. «Halyq ıgiligi» qaıyrymdylyq qory 100 balaǵa arnalǵan ekiqabatty jańa mekteptiń qurylysyn byltyr bastap, bıylǵy oqý jylynda paıdalanýǵa berdi. Aýmaǵy 3,5 myń sharshy metrge teń mektep qurylysyna 750 mln teńge jumsalǵan. Mundaǵy oqý memlekettik tilde ári bir aýysymda júrgiziledi.
Osylaısha, atymtaı jomart azamat aýyl turǵyndaryn zor qýanyshqa keneltti. Ásirese jańa oqý jylynda tabaldyryǵynan tórine deıin zamanaýı dúnıelermen jabdyqtalǵan jańa mektepte oqıtyn oqýshylardyń keýdesin maqtanysh kernep júr. Olar endi jaqsy oqýǵa, úlgili bolýǵa talpynary anyq. Bıyl Qosqudyqtaǵy orta mektepke 86 oqýshy bardy. 5 búldirshin 1-synypqa qabyldandy. «Jalpy, Qosqudyqtyń damý áleýeti joǵary. Irgesinde temir jol stansasy bar ári oblys ortalyǵyna jaqyn ornalasqan. Mektep – mańyzdy ınfraqurylymdyq nysan. Sol arqyly jas mamandardy, jas otbasylardy tartyp, aýylǵa jan bitirýge bolady. Bul – eldi mekenniń damýyna tyń serpin beredi», deıdi Almaty oblysynyń ákimi Marat Sultanǵazıev.
– Búgin otbasym úshin qýanyshty kún. Osy ýaqytqa deıin birneshe mektep qurylysynyń basy-qasynda júrsem de dál búgingideı tolqyǵan emespin. О́ıtkeni bul aýylda ákem Aldabergen týyp-ósken. Jańa mektepti ulym Dáýren salyp berip otyr. Onyń bul isi kóńilimdi kókke kóterdi. Osy aýyldyń mektebinen bilim alyp, bolashaqqa qanat qaqqan ul-qyzdarymyzdyń myqty azamattardyń qataryna qosylaryna senemin, – dedi Qanat Bozymbaev.
Sondaı-aq «Halyq ıgiligi» qoǵamdyq qory mektep ujymyna «Suzuki» markaly avtokólikti syıǵa tartty. Sonymen qatar kópbalaly ári áleýmettik osal toptan shyqqan 12 balany mektepke daıarlap, oqý quraldarymen jáne mektep formasymen qamtamasyz etti.
Zamanaýı mektepte 24 oqý kabıneti, 3 zerthanalyq (fızıka, bıologııa, hımııa jáne ınformatıka) kabınet, kompıýterlik synyp, 2 sheberhana, akt jáne sport zaldary, jattyǵý alańy, sondaı-aq 60 oryndyq ashana men medısınalyq kabınet, kitaphana bar.
Jalpy, Almaty oblysynda bıyl 15 750 oryndyq 16 mekteptiń qurylysy josparlanǵan. Onyń 9-y 1-qyrkúıekte ashyldy. Qalǵan 5 mekteptiń qurylysy jyl sońyna deıin aıaqtalady.
Almaty oblysy