Astanada «Alash Praıd» klýbynyń muryndyq bolýymen aralas jekpe-jekten dúbirli jarys uıymdastyryldy. Oǵan alys-jaqyn shet memleketterden kelgen sportshylar da qatysty.
Keshtiń basty básekesi jartylaı jeńil salmaqtaǵy Qarshyǵa Dáýitbek pen Dıego Brandao arasynda ótti. 29 jastaǵy otandasymyz 14 ret oktagonǵa shyǵyp, 11 ret jeńiske jetken. 10 kezdesýin merziminen buryn aıaqtaǵan. Dıegonyń jasy 36-da. Brazılııanyń Fortaleza qalasynyń týmasy 46 jekpe-jek ótkizip, 26-synda basymdyq tanytypty. 21 qarsylasyn esinen tandyrǵan. 2012 men 2016 jyldar aralyǵynda ol UFC-de óner kórsetti. Álemniń eń beldi promoýsheni uıymdastyrǵan týrnırlerde Brandao ataǵy jer jarǵan Konor Makgregor men Dastın Pore syndy sańlaqtarmen judyryqtasqan. Odan bólek, túrli jarysta Vener Galıev, Marat Balaev, Alekseı Polpýdnıkov, Bıbert Týmenov jáne taǵy basqa tanymal faıterlermen kúsh synasty.
Qarsylasynyń ataq-dańqynan esh qaımyqpaǵan qazaqtyń qaısar uly Astanadaǵy týrnırde brazılııalyq sportshyny uryp jyǵyp, «Alash Praıdtyń» chempıondyq belbeýin ıelendi.