Azııa oıyndarynda jeńgen sportshylarǵa qansha syıaqy beriledi?

«Azııa oıyndarynyń chempıony atanǵan sportshyǵa 10 000 AQSh dollary kóleminde aqshalaı syıaqy beriledi. Al altyn medal ıegerin jarysqa daıyndaǵan jattyqtyrýshyǵa 5000 AQSh dollary qarastyrylyp otyr. Qurlyq birinshiliginiń kúmis júldegeri 5000 AQSh dollary, al jattyqtyrýshysy 3000 AQSh dollary kóleminde syıaqy alady. Sonymen qatar qola medal enshilegen qurama sportshysyna 3000 AQSh dollary, al onyń jattyqtyrýshysyna 2000 AQSh dollary kóleminde aqshalaı yntalandyrý belgilengen», delingen vedomstvo habarlamasynda.

Aıta ketsek, 23 qyrkúıek pen 8 qazan aralyǵynda Qytaıdyń Hanchjoý qalasynda Azııa oıyndary ótedi. Qurlyq birinshiligine 45 memleket qatysady dep josparlanyp otyr.

QR Týrızm jáne sport mınıstrliginiń resmı ókili Móldir Ábdýalıevanyń aıtýynsha, Azııa oıyndaryna qatysatyn ulttyq qurama jasaqtalyp, elimizdiń ár óńirinde oqý-jattyǵý jıyndary ótkizilip jatyr.