Qazynaly qarttardyń el damýyna qosqan úlesi – telegeı-teńiz. Zamannyń qıyn-qystaý shaǵynda qara jumystyń qamytyn kıip, bel jazbaı, tize búkpeı ter tógip, egin ordy, mal baqty. Sonyń nátıjesinde qamba dánge, qora malǵa toldy. Bilim men densaýlyq salasynda da ýaqytpen sanasýdy bilmegen óz isiniń has sheberleri halyqqa qaltqysyz qyzmet etti. Sóıte júrip, talaı balany ómirge ákelip, ultymyzdyń urpaǵyn kóbeıtken ardaqty áke, asyl analardyń eren eńbekteri óskeleń urpaqqa úlgi-ónege.
Búginde Kegen aýylynda myńnan asa qart turady. Olardyń deni – aýyl sharýashylyǵy salasynda súbeli eńbek etkender. Mereke qarsańynda solardyń júzden astamyna qurmet kórsetildi. Aýdandyq Mádenıet úıine jınalǵan qarııalardy Kegen aýylynyń ákimi Rýslan Keńesjanuly quttyqtap, elimizdiń jarqyn bolashaǵy úshin tókken teri men sińirgen eńbegi qashanda qurmetke ıe ekenin atap, alǵysyn bildirdi.
Aýdanǵa tanymal aqsaqaldarmen qatar, tyl ardagerleri Azııat Qaıyńbaeva, Sara Qosaeva, Uldyken Saǵynbekova, kópbalaly analar Kúlásh Muqanova, Zına Abaeva bastaǵan «Altyn alqa» ıegerleri saltanatty is-sharanyń qurmetti qonaǵy bolyp, bir marqaıyp qaldy.
«Aınalaıyn jastar, sender qazynaly qarttardy qurmetteýden kem bolmaısyńdar. Osy qurmetke eńbekpen jetip otyrmyz. El yryzdyǵyn arttyrý jolynda aıanbaı eńbek etińder. Búgin basymyz qosylyp, qurby-qurdastarymdy kórip, máre-sáre bolyp qaldyq. Syı-qurmetterińe alǵysymyzdy aıtamyz», dedi tyl ardageri Azııat apa.
Mereke qarsańynda balasha qýanǵan qarttarǵa aýdan ónerpazdary tamyljyta án salyp, kúı shertip, kóńilin kóterdi.
Almaty oblysy