Ekibastuzda jylý berý maýsymyn bastaý úshin oblys ákimi jylýdy iske qosý prosesin ózi baryp qadaǵalaýǵa alǵan, dep habarlaıdy Egemen.kz óńir ákimdigine silteme jasap.
Mundaǵy qaıta jańartylǵan № 2, 5, 8, 12 tórt jylý magıstraline júrgizilgen gıdravlıkalyq synaqtar men jelilerdi jýý jumystary sátti aıaqtalǵan. Qazir magıstraldar hımııalyq tazartylǵan sýmen toltyrylyp jatyr.
Kóktem men kúz mezgilderindegi gıdravlıkalyq synaqtar kezinde anyqtalǵan barlyq aqaýlar joıylǵan. Jeliler jylý jáne ystyq sýmen qamtamasyz etý úshin jylý energııasyn berýge daıyn tur.
Qalaǵa jylý berýdi bastaý maqsatymen Ekibastuzǵa kelgenin jáne qalada úsh kún bolatynyn aıtqan oblys ákimi: «Iske qosý kezinde jylý jelileri qyzmetkerleriniń, energetıkterdiń jáne jergilikti ákimdiktiń jumysy jylýmen jabdyqtaýdyń barlyq júıesin teńdestirýge baǵyttalatyn bolady. Bul retteýdi qajet etetin tehnologııalyq turǵydan kúrdeli júıe, sondyqtan, qazan aıynyń basynda biz ony táýlik boıy baqylaıtyn bolamyz. Barlyq jeliler daıyn. Ekibastuzda barlyǵy 400 shaqyrymǵa jýyq jeli bar, onyń 74 shaqyrymy aýystyryldy, bul 20%-dan sál ǵana tómen. О́kinishke qaraı, qalǵan 80%-y eski jeliler jáne olarda jylý bergende jedel túrde joıylatyn kishigirim aqaýlar oryn alýy múmkin. О́tken jyly bolǵan jaǵdaıǵa jol bermeımiz», dedi.
Jylý berý barysynda anyqtalǵan eskertýlerdi jedel joıý úshin 19 jóndeý brıgadasynyń kezekshiligi uıymdastyrylǵan.
Ekibastuz JEO-da 4 qazandyq agregaty (3 energetıkalyq jáne 1 sý jylytý) daıyn. 10 qazanǵa deıin taǵy 2 sý jylytý qazandyǵy iske qosylady, al, qalǵan 4 qazandyq qazan aıynyń sońyna deıin aıaqtalady.