Memleket basshysy Qasym-Jomart Toqaev Qazaqstandaǵy «Shell» konserniniń 30 jyldyǵyna arnalǵan saltanatty jıynǵa qatysty, dep habarlaıdy Egemen.kz Aqordanyń baspasóz qyzmetine silteme jasap.
Prezıdent saltanatty sharadaǵy sóılegen sózinde halyqaralyq «Shell» energetıkalyq konserni elimizdiń munaı-gaz ónerkásibi salasyndaǵy alǵashqy sheteldik ınvestorlardyń biri ekenin aıtty. Memleket basshysy «Shell» konserniniń Qazaqstandaǵy qyzmetiniń 30 jyldyǵy sala tarıhyndaǵy mańyzdy kezeń sanalatynyn da jetkizdi.
– Qıyn-qystaý jyldary «Shell» ekonomıkamyzǵa qomaqty ınvestısııa quıyp, jańa tehnologııa, ǵylymı jetistikter men basqarýdyń baǵa jetpes tájirıbesin ákeldi. Biz kompanııanyń bul eńbegin joǵary baǵalaımyz. Sońǵy 30 jylda «Shell» el ekonomıkasyna 18 mıllıard dollardan astam ınvestısııa salyp, Qazaqstandaǵy eń iri sheteldik ınvestorlardyń biri retindegi pozısııasyn nyǵaıtty, – dedi Memleket basshysy.
«Prezıdent «Shell» konserni basqa da seriktestermen birge elimizde aýqymdy munaı-gaz jobalaryn belsendi júzege asyryp jatqanyn atap ótti. Kompanııa álemdegi eń iri munaı-gaz kondensaty ken oryndarynyń biri – Qarashyǵanaqtyń operatory sanalady. Qarashyǵanaqty keńeıtý jobasynyń kezeńderin ýaqtyly iske asyrý suıyq kómirsýtegin óndirýdi 10-11 mıllıon tonna deńgeıinde saqtaýǵa yqpal etedi. – «Shell» konserniniń jáne basqa da aksıonerlerdiń úılesimdi jumysy Qashaǵannyń «ǵasyr jobasyn» iske qosýǵa múmkindik berdi. Búginde Soltústik Kaspıı jobasy jahandyq energııa naryǵynda mańyzdy ról atqarady jáne elimizdegi munaı óndirisiniń 20 paıyzyn qamtıdy. Kómirsýtegin óndirýden basqa, olardy álemdik naryqtarǵa tasymaldaý úshin ınfraqurylym qurýdyń mańyzy zor. Bul baǵyttaǵy alǵashqy tabysty joba – Kaspıı qubyr konsorsıýmy. Ony júzege asyrýǵa «Shevron», «ENI», «Shell», «Lýkoıl» jáne taǵy basqa jetekshi munaı kompanııalary qatysty, – dedi Prezıdent. Memleket basshysy Qazaqstanda transulttyq munaı-gaz korporasııalarynyń eńbek etýi elimizdiń joǵary ınvestısııalyq tartymdylyǵyn kórsetetinin, sonyń ishinde ınvestorlardyń quqyqtary men múddelerin qorǵaý baǵytyndaǵy zańnamanyń turaqty saqtalatynyn aıtty», delingen habarlamada.