Ortalyq saılaý komıssııasy aýdandyq jáne oblystyq mańyzy bar qala ákimderiniń saılaýyna daıyndyqtyń qorytyndysyn shyǵardy, dep habarlaıdy Egemen.kz.
Ortalyq saılaý komıssııasynyń otyrysynda Nurlan Ábdirov saılaý ótetin óńirlerge saparlar bastalǵanyn habarlady.
«5 qarashaǵa belgilengen aýdandyq jáne oblystyq mańyzy bar qala ákimderiniń pılottyq saılaýyn ázirleý jáne ótkizý sheńberinde aýmaqtyq saılaý komıssııalaryna ádistemelik jáne praktıkalyq kómek kórsetý maqsatynda Ortalyq saılaý komıssııasynyń músheleri barlyq 17 okrýgke issaparǵa shyqty. Máselen, búginge deıin 9 oblysty aralap, aýdandyq jáne oblystyq mańyzy bar 24 qaladaǵy saılaýdyń barysymen tanystyq. Jumys saparlarymyz jalǵasyn tabady», dedi N.Ábdirov.
OSK tóraǵasy aımaqtarda kandıdattardy tirkeý 16 qyrkúıekte bastalyp, 5 qazanǵa deıin jalǵasatynyn aıtty.
Jumys qorytyndysyn jarııalaǵan Ortalyq saılaý komıssııasy tóraǵasynyń orynbasary Konstantın Petrov barlyq óńirler boıynsha 249 kandıdat tirkelgenin aıtty.
«Bizdiń málimet boıynsha, 45 ákimniń bos ornyna 249 úmitker tirkelgen. Bir orynǵa orta eseppen 5 úmitkerden keledi. Degenmen, básekelestik aımaqqa baılanysty ózgeredi. Atap aıtqanda, bir orynǵa 9 úmitkerden keletin óńirler bar. Kýrchatov qalasynda, Jambyl oblysynyń Jýaly aýdanynda, Jetisý oblysynyń Kerbulaq aýdanynda jáne Túrkistan oblysynyń Báıdibek aýdanynda úmitkerler kóp. Eń azy Aqmola oblysynyń Jaqsy aýdanynda, Atyraý oblysynyń Isataı aýdanynda, Qostanaı oblysynyń Altynsarın, Qarabalyq jáne Denısov aýdandarynda», dedi K.Petrov.
Onyń aıtýynsha, tirkelgen kandıdattardyń 63 paıyzdan astamy ózin-ózi usynsa, qalǵan 36 paıyzy negizinen saıası partııalardan saılaýǵa túsken.
«Úmitkerlerdiń ortasha jasy – 47 jas. Eń úlkeni 1961 jyly, jasy 1993 jyly týǵan azamattar. Úmitkerlerdiń basym bóligi erler, 13 áıel adam bar», dedi K.Petrov.
Usynylǵan kandıdattardyń 63 paıyzy memlekettik qyzmetshiler, 6 paıyzdan astamy ýaqytsha jumyssyzdar. Qalǵandary túrli salada eńbek etip júrgen azamattar.