Synaptaı syrǵyǵan ýaqyt adamzattyń turmys-tirshiligine jańasha sıpat berip qana qoımaı, soǵan saı jańa mamandyq ıelerin oqytýdy, daıarlaýdy talap etip otyr. Bul jóninde «Eń úzdik kásiptik bilim berý uıymy» baıqaýynda aıtyldy.
Osy kúni Almaty oblysynda 40 kásiptik-tehnıkalyq bilim berý mekemesi jumys isteıdi. Olardyń úzdigin anyqtaý maqsatynda uıymdastyrylatyn dástúrli baıqaý bıyl da jalǵasyn tapty. Baıqaý sharttaryna sáıkes ár oqý orny materıaldyq-tehnıkalyq bazasyn tanystyryp, jetistikterimen bólisti. Mundaı is-shara kolledjderdegi basqarý júıesiniń sapasy men básekege qabilettiligin arttyrýmen qatar, tehnıkalyq bazasy men sıfrlyq ınfraqurylymyn damytýǵa yqpal eteri sózsiz.
– Prezıdent tapsyrmasy boıynsha memlekettik baǵdarlamalardan ulttyq jobalar formatyna kóshý júzege asyrylyp jatqany barshaǵa aıan. «Bilimdi ult» sapaly bilim berý ulttyq jobasynyń tórtinshi mindeti – qoljetimdi jáne sapaly tegin tehnıkalyq jáne kásiptik bilimmen qamtý, memlekettik tapsyrys kólemin ulǵaıtý. Bıylǵy oqý jylynda melekettik tapsyrys 100 paıyz oryndaldy. Alaıda NEET sanatyndaǵy jastardyń oqýmen qamtylýyn, jumyssyzdyq máselesin joıý, eńbek naryǵy men bilim berý júıesi arasyndaǵy baılanys túlekterdi bitirgennen keıin alty aı ishinde jumysqa ornalastyrý arqyly baqylanatynyn eskersek, atalǵan máseleler áli de ózekti bolyp otyrǵanyn kóremiz. О́tken oqý jylynda óńirlik kásiporyndardyń surnystaryna sáıkes maqsatty oqytý boıynsha 100 stýdentti qabyldasaq, bıylǵy oqý jylynda bul kórsetkishti 200-ge arttyrdyq. Kásiporyndarmen birlese atqarǵan jumysymyz úsh jaqqa da tıimdi, – dedi Almaty oblystyq bilim basqarmasy basshysynyń orynbasary Gúlsara Isaǵulova.
2024-2025 oqý jylynyń bilim berý baǵdarlamalary jańa jalpyǵa mindetti bilim berý standarty negizinde ázirlenip, biryńǵaı aqparattyq ortanyń tizilimine tórt kezeń boıynsha engiziletin bolady. Osy ózgeristerdi eńserýde otandyq ózektendirilgen kásibı standarttardy, dýaldy oqytý júıesin, formaldi, formaldi emes oqytý túrlerin, arttyrýdy, jańa kásipter atlasynyń talaptaryna sáıkes jańa mamandyqtar ashý, sıfrlyq biliktilikti jetildirý máselesin iske asyrýdy jan-jaqty oılastyra otyryp, oryndaý qajettigin atap ótti.
– Qazirgi naryqtyń suranysy tehnıkalyq, qurylys mamandyqtaryna basymdyq berip otyr. Alaıda IT salasyna mamandar qajet degen oqý oryndary áli kúnge «Esepteý tehnıkasynyń operatory» degen mamandyqty júrgizip otyr. Eskiden arylyp, zamannyń aǵysynan qalmaı óndiriske engen jańalyqtardy der kezinde baǵyndyrýymyz qajet. Aldaǵy oqý jylynda óńirimizdiń naryǵyna, Qonaev qalasynyń damýyna qajetti «Ǵımarattardy jobalaý men paıdalanýdyń avtomattandyrylǵan júıeleri», «Ǵımarattardy basqarýdyń zııatkerlik júıesine qyzmet kórsetý tehnıgi», «Aqparattyq qaýipsizdik», «Aqparattyq jelini baǵdarlamalyq qamtamasyz etý» syndy jańa mamandyqtardy ashyp, biliktilikterdi kóbeıtý arqyly bilim alýshylardy maqsatty oqytý boıynsha qabyldaýymyz kerek. Sonda ǵana biz oqý ornynyń ornyqty damýyn, sapaly bilimniń qoljetimdiligin qamtamasyz etetin bolamyz, – dedi G.Isaǵulova.
Baıqaý erejesine sáıkes áýeli «Jas maman» jobasyna engen kolledj qyzmetkerleri óz tájirıbesimen bólisti. Budan keıin mekemelerdiń árqaısysy kásibı qyzmet jetistikterin aıqyndaıtyn saıysqa tústi. Al odan keıingi kezekte tabysty bilim berý uıymynyń zamanaýı modeli usynyldy. Baıqaýǵa qatysýshylar jarystyń ár týryna tııanaqty daıyndalǵandyǵyn ańǵartty. Sondyqtan árqaısynyń jeńiske degen qulshynysy zor boldy.
– Oblystyq úzdik kolledj baıqaýyna úlken daıyndyqpen keldik. Kolledjde 390 stýdent 6 mamandyq boıynsha bilim alady. «Jas maman» jobasy boıynsha 270 mln 770 myń teńgege zamanaýı oqý quraldaryn alǵan bolatynbyz, sol arqyly stýdentterdiń bilim kókjıegi keńip, óndiristik tájirıbeleri sapaly júrgizilip jatyr, – deıdi Shelek polıtehnıkalyq kolledjiniń dırektory Qýat Dúısebaev.
«Eń úzdik kásiptik bilim berý uıymy – 2023» oblystyq baıqaýynyń qorytyndysy boıynsha Talǵar agrobıznes jáne menedjment kolledji 1-oryn ıegeri atansa, 2-oryndy Kásiptik oqýdaǵy kópsalaly kolledj jeńip aldy. Al 3-orynǵa Talǵar polıtehnıkalyq kolledji turaqtady. Baıqaý jeńimpazdaryna 100-300 myń teńge aralyǵyndaǵy sertıfıkattar tabys etildi. Sondaı-aq Talǵar joǵary medısınalyq kolledji «Innovasııa sheberhanasy», Shelek polıtehnıkalyq kolledji «Jańashyl kolledj» jáne Qaskeleń kásiptik-tehnıkalyq kolledji «Jetistik jolynda» nomınasııalary boıynsha laýreat atandy.
Almaty oblysy