IýNESKO uıymy jyl saıyn «Jibek joly – jastar kózimen» atty halyqaralyq fotobaıqaý ótkizýdi dástúrge aınaldyrdy. Bıyl da bul úrdis jalǵasyn tapty.
Bıylǵy baıqaýǵa álemniń 101 elinen 6700 adam qatysyp, olar ózderi túsirgen fotolaryn jiberipti. Osynda 14-17 jas aralyǵyndaǵy úmitkerler arasynan mońǵolııalyq qazaq bala Aqjol Qaınaruly túsirgen foto úzdikter sapynan tabylyp, júldege ıe bolypty.
О́zderińiz kórip otyrǵandaı, báıge alǵan fotoda sol eldegi qazaq aǵaıyndar jaılaýǵa jańadan kóship kelip, alty qanat keregesi jelkóz, toqsan basty kıiz úıin tigip jatqan kórinis túsirilgen. Úıdiń syrtynda órnek salyp oralǵan toqymaly shıi kózge tússe, jalańash ýyqty aq jabyndymen búrkemelep jatyr...
Báıge alǵan bala haqynda jergilikti baspasóz jarysa jazyp jatyr. Olardyń aıtýynan ańǵarǵanymyz, bundaı úlken baıqaýdan júldeger (3-oryn) ataný – zor jetistik ári memlekettiń abyroıyn kóteretin oqıǵa. Osy oraıda, qazaq atyn jalpaq álemge tanytyp úlgergen Aqjol balamyzǵa habarlasyp, mán-jaıdy bildik:
«Men 2006 jyly Baı-О́lke aımaǵynyń ortalyǵynda dúnıege keldim. Qazir stýdent ataný úshin emtıhanǵa daıyndalyp júrmin. Tabıǵatty, kóshpeli ómir saltyn fotoǵa túsirý – bala kezden qalyptasqan súıikti isim. Sonymen qatar bokspen shuǵyldanyp júrmin. Jasóspirimder arasynda el birinshiliginiń kúmis medal ıegerimin», deıdi ol.
Al «IýNESKO uıymdastyrǵan fotobaıqaýǵa qalaı qatysyp júrsiń?» degen suraǵymyzǵa: «2021 jyly Mońǵol fotosýretshiler odaǵynyń saıtynan «Japonııanyń Hıgashıkava qalasynda jasóspirimder arasynda halyqaralyq baıqaý ótetini» týraly aqparatty kórip qaldym. Baıqaýǵa ózim túsirgen 12 sýretti jiberdim. Qarasha aıynda qorytyndysy shyǵady degen habar aldym. Sodan 8 qarasha kúni meniń fotolarym júldege laıyq dep tanylǵany týraly hatpen birge Japonııa eline saıahattaıtyn joldama qosa keldi», deıdi Aqjol.
Osylaı qazaqtyń kóshpeli ómirin sýretke túsirip, halyqaralyq báıgelerge joldaýdy ádetke aınaldyrǵan Aqjol joǵarydaǵy IýNESKO báıgesine de baq synap kórgen. Uıymdastyrýshylar osylardyń ishinen munda ózderińiz kórip otyrǵan fotony tańdap alyp, bul sýret týraly túsindirme jazyp jiberýdi ótinipti. Ony shamasynsha jazyp jibergen eken.
«О́tken aıdyń 20-sy kúni IýNESKO-dan habar kelip tur. Onda meniń sýretim júldege ilingendikten, marapataý rásimi ótetin Qytaı eliniń astanasy Beıjińge tez jetińiz delinipti», deıdi ol.
Aqjol barǵan. Qomaqty syılyq alǵan. Uıymdastyrýshylar: «Siz túsirgen foto bas júlde alýǵa laıyq edi, biraq ózińiz onyń aǵylshyn tilindegi túsindirmesin jaqsylap jazyp bere almadyńyz» degen kórinedi.