Qys – qyr astynda. Alty aı aq kórpe jamylatyn aspantaý eli úshin tonnalap kómir túsirip, kúl shyǵarýdyń ýaıymy az emes. Qońyr kúz túsip, aq qyraý turǵan kezden bastap ár úıdiń murjasynan kók tútin óriletin ólkeniń qysy erte, jazy kesh keletini belgili.
Osyǵan oraı, «Aldaǵy qys maýsymyna óńir jurtshylyǵynyń daıyndyǵy qandaı?» degen saýalymyzdy Raıymbek aýdany ákiminiń orynbasary Ǵalym Jýsanbaevqa qoıǵan edik. «Raıymbek aýdanynda qysqy jylytý maýsymyna daıyndyq sharalary júıeli júzege asyrylyp jatyr. Áleýmettik nysandar bar, jalpy sany 7600 tútinnen turatyn aýdan turǵyndary bir maýsymda 40 myń tonnaǵa jýyq kómir jaǵady. Turǵyndar tutynatyn kómir tutastaı derlik aýdanymyzdaǵy «Oıqaraǵaı» kómir keninen tasymaldanady. Búgingi tańda ken ornynda kómir baǵasy – tonnasyna 8500 teńge. Aýdan aýmaǵyndaǵy eldi mekenderge jol qashyqtyǵyna baılanysty 14 pen 17 myń teńge aralyǵynda jetkiziledi. Ken orny jylyna 65-70 myń tonna kómir óndirýge qaýqarly. Sol sebepti, kómir tapshylyǵy joq. Áleýmettik nysandar men bilim oshaqtary jylytý maýsymyna tolyqtaı daıyn», deıdi aýdan ákiminiń orynbasary.
Almaty oblysy