Halyqtyń densaýlyǵyn jaqsartýmen qatar, medısınalyq kómektiń qoljetimdiligin arttyrý – alǵashqy mindetterdiń biri. Osy baǵytta Talǵar aýdanynda «Philips Foundation» halyqaralyq kommersııalyq emes uıymy «Sábı» qorymen birlesip, elimizde joǵary tehnologııalyq medısınalyq kómektiń qoljetimdiligin arttyrýǵa yqpal etetin qaıyrymdylyq bastamasyn iske qosty.
Bastama aıasynda 7 aýdandyq aýrýhana 18 mobıldi ýltradybystyq júıege ıe boldy. Sonymen qatar Almaty jáne Jetisý oblystarynyń 30 dárigeri ınnovasııalyq jabdyqtarmen jumys isteýdi úırenip, jattyqty. Atalǵan jobanyń maqsaty – shalǵaı aımaqtardaǵy pasıentterge joǵary tehnologııalyq medısınalyq kómektiń qoljetimdiligin arttyrý. Bastamany júzege asyrý úshin mobıldi qosymshanyń negizinde jumys isteıtin jáne planshetke, smartfonǵa qosylǵan datchıkter jıyntyǵy – portatıvti ýltradybysty júıe tańdaldy. Innovasııalyq sheshim stasıonarlyq ýltradybystyq jabdyqty paıdalaný múmkin bolmaǵan klınıkalyq jaǵdaılarda pasıentterdiń jaǵdaıyn jedel ýltradybysty baǵalaý úshin arnaıy ázirlengen. Qazaqstandaǵy «Philips Healthcare» Densaýlyq saqtaý jobalarynyń jetekshisi Janetdın Shýtanov, eń aldymen, bul emdeý mekemelerinen tys jerde, ıaǵnı oqıǵa ornyndaǵy qıyn jaǵdaılarda shuǵyl medısınalyq kómek kórsetýge qolaıly qural ekenin túsindirip ótti.
«Joba aıasynda medısınalyq kómektiń sapasyn arttyrýǵa dárigerlerdiń ózderi úles qosatyny sózsiz. Búgin munda anestezıolog-reanımatologter, kardıologter, terapevtter, nevrologter, akýsherler, gınekologter jáne hırýrgter jınaldy. Jedel járdem dárigerleri úshin portatıvti ýltradybysty qurylǵylar ár sekýndy mańyzdy bolǵan kezde naýqastyń jaǵdaıyn qaı jerde ornalasqanyna qaramastan 3-5 mınýt aralyǵynda baǵalaýǵa múmkindik beredi. Sonymen qatar kezekshi kardıologterdiń kúndelikti tájirıbesine protatıvti ýltradybysty engizý dıagnostıkalyq jáne emdeý úderisin ýaqytty únemdeý arqyly ońtaılandyrýǵa múmkindik beredi. Bizdiń esepteýimiz boıynsha shuǵyl jaǵdaılarda kardıologterdiń sheshim qabyldaý ýaqyty orta eseppen 75 mınýtqa qysqarady. Bul shuǵyl kómek úshin óte mańyzdy», dedi J.Shýtanov.
Is-shara barysynda Nıderlandtyń Ortalyq Azııadaǵy elshisi Nıko Shermers onlaın arqyly nıderlandtyq kommersııalyq emes kompanııa men Qazaqstan arasyndaǵy qundy yntymaqtastyqtyń ornaǵanyna qýanyshty ekenin jetkizdi.
Búginde halyq sany 1,5 mln-ǵa jýyqtaıtyn Almaty oblysy turǵyndarynyń 95 paıyzy – aýyl turǵyndary. Olarǵa 398 medısınalyq nysanda qyzmet kórsetiledi. Munyń 340-y – memlekettik, 58-i – jekemenshik nysan. Osylardyń barlyǵynda 10 myńnan asa meıirbıke, 3 myńnan asa dáriger jumys isteıdi.
«Densaýlyq saqtaý júıesi kovıdten keıingi kezeńnen soń medısınalyq kómek kórsetý sapasyn arttyrý úshin óz tájirıbesine jańa standarttar men tehnologııalardy engizip jatyr. Protatıvti jabdyq shuǵyl jaǵdaılarda pasıentterdi emdeýdi jańa deńgeıge shyǵaratynyna, medısınalyq mekemelerdiń múmkindigin keńeıtetinine jáne óńirdiń aýdandyq eldi mekenderiniń 300 myńǵa jýyq turǵynyna sapaly medısınalyq kómek kórsetetinine senimdimin. Búgin Talǵar aýdanyna jáne shalǵaıdaǵy Raıymbek pen Kegen aýdandaryna 9 júıe berildi. Naýqastarǵa tegin qyzmet kórsetiledi. Tıimdiligi artyp jatsa, kóbeıtýge tapsyrys beremiz», dedi Almaty oblysy densaýlyq saqtaý basqarmasynyń basshysy Lázzat Aqtaeva.
«Protatıvti ýltradybysty júıelerdiń kómegimen Almaty jáne Jetisý oblystarynyń dárigerleri árbir dıagnozǵa senimdi bolý úshin vızýalızasııa júrgize alady. Al ýaqtyly dıagnoz qoıý – tıimdi emdeýdiń kepili», dedi «Sábı» qaıyrymdylyq qorynyń prezıdenti Ásel Tasmaǵambetova.
Qurylǵanyna 21 jyl bolǵan bul qor belsendi ári úzdiksiz qyzmet barysynda respýblıkalyq mańyzy bar 10-nan asa biregeı baǵdarlamany ázirlep, iske qosqanyn aıtý artyq etpes.
Almaty oblysy