Memleket basshysy Qaraǵandy oblysynda kenshilerdiń qaza tabýyna baılanysty kóńil aıtty. Bul týraly Aqordanyń baspasóz qyzmeti telegram arnasynda habarlady, dep jazady Egemen.kz.
Qazaqstan Prezıdenti Qasym-Jomart Toqaev Qaraǵandy oblysyndaǵy Kostenko atyndaǵy shahtadaǵy órt saldarynan qaza tapqan kenshilerdiń týǵan-týystary men jaqyndaryna kóńil aıtyp, zardap shekkenderdiń tezirek saýyǵyp ketýin tiledi.
Memleket basshysy Úkimetke kenshilerdiń otbasylaryna barlyq qajetti kómek kórsetýdi tapsyrdy. Oqıǵanyń mán-jaıyn anyqtaý úshin úkimettik komıssııa quryldy.
Úkimetke «ArselorMıttalTemirtaý» kompanııasymen ınvestısııalyq yntymaqtastyqty toqtatý tapsyryldy.
Eske salaıyq, buǵan deıin Kostenko shahtasynda 11 kenshiniń qaza bolǵanyn habarlaǵan edik.