Qaraǵandy oblysynyń ákimdigi ýákiletti memlekettik organdarmen birlesip, Kostenko atyndaǵy shahtada bolǵan órt saldarynan qaza tapqan «ArselorMıttal Temirtaý» AQ jumysshylarynyń otbasy músheleriniń tizimin jasap jatyr. Memleket basshysynyń tapsyrmasy boıynsha olarǵa tolyqqandy kómek kórsetiledi, dep habarlaıdy Egemen.kz Úkimettiń baspasóz qyzmetine silteme jasap.
Qaza tapqan kenshilerdiń otbasylaryna jan-jaqty kómek kórsetiledi. Atap aıtar bolsaq:
– kompanııa qarajaty esebinen otbasylarǵa baspana satyp alý;
– moraldyq zııan úshin 10 jyldyq jalaqy mólsherinde birjolǵy tólem;
– asyraýynda bolǵan balalarǵa 18 jasqa tolǵanǵa deıin aı saıynǵy saqtandyrý tólemi (JOO stýdenti bolsa, 23 jasqa deıin);
– Memlekettik áleýmettik saqtandyrý qorynan jalaqysyna baılanysty aı saıynǵy tólem;
– qamqorlyqtaǵy adamdardyń sanyna baılanysty asyraýshysynan aıyrylý jaǵdaıy boıynsha aı saıynǵy memlekettik járdemaqy;
– jumys berýshiniń qarajaty esebinen otbasylardyń nesıelerin óteý;
– jerleýge baılanysty barlyq shyǵyndardy óteý;
– qaza tapqandardyń balalary men jubaılaryn jumysqa ornalastyrý;
– 23 jasqa deıingi balalardyń oqý aqysyn tóleý;
– qaza tapqandardyń jubaılary men balalaryna sanatorıı-kýrorttyq emdelýge joldamalar berý;
– úıdi peshpen jylytatyn otbasylarǵa jyl saıyn kómir bólý.
Memleket basshysynyń tapsyrmasyna sáıkes «ArselorMıttal Temirtaý» AQ-nyń qaza tapqan qyzmetkerleriniń otbasylaryna barlyq qajetti kómek kórsetý máseleleri Úkimettiń erekshe baqylaýynda bolady.