Temir joldy saıyn dalanyń búlkildep soqqan tamyry desek, baıtaq eldiń tynysy taǵy bir ret keńeıdi dep aıta berýge bolady. Alystaǵy aǵaıyny úshin alys jol júrýdi aýyr kórmeıtin qazaqqa maýsym aıynyń 2-sinen bastap № 41-42 Almaty-Atyraý baǵytyndaǵy jańa quramdaǵy sý jańa júrdek poıyz qyzmetine kiristi.
Jaıyq boıyndaǵy toı jasap jatqan týysqannyń shaqyrtýymen biz de jańadan tusaýy kesilgen poıyzdyń kezekti bir saparyna kýáger boldyq. Vagon ishine engen sátten ondaǵy tósek-oryn, ústel, perdelerdiń qoldan jańa shyqqandyǵy kózge uryp turdy. Jolaýshylar jaıǵasqan oryndarynyń “betin ashý” ózderine buıyrǵanyna máz bolǵandaı, bir-birlerine jańa vagon týraly aıtyp shúıirkelesip ketti. Poıyz da ornynan qozǵalyp, batysty baǵyt etken boıy ońtústik jerimen júrip keledi. Kásibimiz jýrnalıst bolǵan soń ózge vagon turǵyndaryna da qutty bolsyn aıtaıyq ári qýanyshyn bóliseıik dep biz de vagon aralap kelemiz. Aıta ketetin nárse, jolaýshylardy ońtústiktiń shujyq shyjǵyrtýǵa kúshi jetetin ystyǵynan vagon ishindegi aýa tazartqysh ári jeldetkish qurylǵy qutqaryp otyrdy. Ádette, qolyndaǵy oramalymen betin jelpip otyratyn jolaýshylar qosymsha jumystan qutylǵanyna rıza bolysty.
Jańa poıyzdyń mán-jaıymen tanysý maqsatynda poıyz bastyǵy Asanhan Bilálovpen tildesken edik. Ol bylaı dedi: “On segiz jyldan beri osy salada qyzmet etip kelemin. Zaýyttan shyǵyp el ıgiligine aınalyp úlgergen poıyzdyń noqta aǵasy bolǵanyma qýanyshtymyn. Bul poıyz jolaýshylar tasqynynyń artýyna baılanysty burynǵy poıyzǵa qosymsha kúsh retinde jolǵa shyǵarylyp otyr. Buǵan “Ońtústik” aımaqtyq fılıalynyń dırektory Asqar Shúkirbaevtyń eńbegi sińdi dep aıtýǵa tolyq negiz bar. Sol azamat kelgeli ujymnyń jumysy alǵa jyljyp, qyzmetkerlerdiń jaǵdaıy jaqsardy. Al ózim basqaratyn poıyz týraly aıtsam, ár vagonda eki jolserik qyzmet isteıdi. Barlyǵy – 14 vagon. Onyń 4-ýi plaskart, 4-ýi eki oryndyqty jumsaq vagon, 6-ýy kýpeli vagon. Burynǵy poıyzda tek arnaıy vagondarǵa ǵana jeldetkish ornatylsa, qazir ol qurylǵy bizdiń poıyzdyń barlyq vagonynda bar. Jolaýshylarǵa qant-shaı úlestiriledi. Gıgıenalyq tazalyqqa asa muqııat qaraımyz. Vagonda ystyq sý da, sýyq sý da bar. Sonymen qosa, restorandyq qyzmet kórsetý ortalyǵy jumys isteıdi”.
Vagonymyzǵa qaıta kelip jaıǵasardyń aldynda jolserikpen áńgime júrgizýdi jón kórdik. Jasy otyzdar shamasyndaǵy jigit jalaqysyna kóńili tolatynyn basa aıtty. Sý jańa formasy boıyna jarasqan azamat “tek áıelińniń qasyńda bolmaıtyny qıyndaý, qalǵanynyń bári jaqsy”, dep ázildep qoıdy. Poıyz aqyrǵy aıaldamasyna eki túndi ortaǵa salyp keshki 23.30-da Atyraý qalasyna toqtady. Endi jańa poıyzdy keri jol kútip tur.
Beıbit AIаT, jýrnalıst.
ALMATY-ATYRAÝ.