Shekaraly aımaq – Raıymbek aýdanynyń Súmbe aýylynyń jastaryn shat-shadyman etken aıtýly jańalyq – zamanaýı sport kesheniniń paıdalanýǵa berilýi. Aýyldyń ajaryn ashyp, turǵyndar kóńilin kópsitken eńseli ǵımarat 1 gektardan astam aýmaqty alyp jatyr.
Aýlasynda basketbol jáne fýtbol alańdary, kólikterge arnalǵan turaq, vorkaýt alańy ornalasqan. Al keshenniń ishinde 70 kórermenge arnalǵan sport, boks, fıtnes, kúres, tipti gımnastıka zaldary bar. Sonymen qatar ǵımaratta medısınalyq pýnkti, dárethana, kıim ilgishtiń bolýy aýyl jastarynyń, ásirese sportqa áýes balalardyń qýanyshyn eseledi. Munda bir ýaqytta 100-den astam jas sportpen shuǵyldana alady. Sport keshenin jylytý úshin bloktyq-modýldik qazandyq ornatylǵan. Qurylysqa 1 mlrd teńgege jýyq qarjy jumsalǵan.
Almaty oblysynyń ákimi Marat Sultanǵazıev taýly aýdanǵa barǵan issaparynda aýyl turǵyndarymen júzdesip, Súmbe aýyldyq sport kesheniniń ashylý saltanatyna qatysty.
«Aýylda sportqa qyzyǵýshy balalardyń kóp bolǵany qýantady. Bul nysannyń salamatty ómir saltyn halyq arasynda dáripteýde mańyzy zor. Jalpy, Narynqol óńiriniń jastary belsendi ári talantty. Osy sport kesheninen elimizdiń týyn kókke kóteretin, aıbyndy jastar tárbıelenip shyǵady dep úmittenemiz», dedi óńir basshysy.
Shetkeridegi Súmbe aýylynyń ınfraqurylymy aı ótken saıyn jańǵyryp, jandanyp keledi. Bulaı deýimiz negizsiz emes. Osy jyldyń mamyr aıynda aýylda quny jarty mıllıonǵa jýyqtaıtyn mádenıet úıi ashylsa, endi mine, áleýmettik nysan qatary halyqtyń ıgiligine arnalǵan sport keshenimen tolyǵyp, jastardyń qulshynysy men qyzyǵýshylyǵyn arttyryp keledi.
Almaty oblysy