Oral qalasynda 500 oryndyq Stýdentter úıi paıdalanýǵa berildi. 9 qabatty ǵımaratty óz qarjysyna kótergen Mahambet О́temisuly atyndaǵy Batys Qazaqstan ýnıversıteti stýdentterin jataqhanamen tolyq qamtamasyz etti.
Keremet jańalyqty stýdentter kópten kútken edi. Ýnıversıtet rektoraty kópten josparlaǵan, oblys basshylyǵynyń qoldaýyn tapqan, kezinde «Amanat» partııasynyń saılaýaldy baǵdarlamasyna da enip, elge ýáde etilgen joba aqyry sátimen júzege asty. Bul qurylys elimizdiń Ǵylym jáne joǵary bilim mınıstrliginiń de erekshe nazarynda boldy. Stýdentter úıin tabys etken saltanatty jıynda Ǵylym jáne joǵary bilim mınıstri Saıasat Nurbek te quttyqtaý lebizin áleýmettik jeli arqyly onlaın joldady.
– Búginde ýnıversıtette 500 oryndyq jańa stýdentter úıi ashyldy. Ýnıversıtet respýblıka boıynsha tuńǵysh ret óz qarajatyna stýdentter úıin turǵyzdy. Bul tájirıbeni aldaǵy ýaqytta ózge de joǵary oqý oryndary jalǵastyrady degen senimdemiz. Boı kótergen jataqhananyń múmkindikteri orasan, – dedi mınıstr óz sózinde.
Aıta keteıik, jańa ǵımarat zamanaýı ınfraqurylymmen tolyq jabdyqtalǵan. Ár seksııada ashana, jatyn jáne jýyný bólmeleri bar. Sonymen qatar múmkindigi shekteýli stýdentterge laıyqtalyp 16 oryn jasaqtalǵan. Sondaı-aq munda fıtnes zaly, dárihana, medısınalyq pýnkt, kafeterıı, muǵalimder men kezekshilerge arnalǵan bólmeler bar. Jataqhana aýmaǵy da tolyq abattandyrylyp, sport quraldary qoıylǵan alańmen qamtylǵan.
Mınıstr óz sózinde ýnıversıtetpen tyǵyz baılanys ornatyp, qurylys nysanynyń sátti aıaqtalýyna atsalysqan Batys Qazaqstan oblysynyń ákimi Narıman Tóreǵalıevke, merdiger «Beta Services» kompanııasynyń basshysy Bekbolat Shkanovqa jáne ýnıversıtet basshylyǵyna alǵys aıtty.
– Bul jataqhananyń irgetasy qalanǵan kúnnen bastap, ýnıversıtet árbir kirpishtiń túzý qalanyp, sapaly stýdentter úıiniń salynýyna nazar aýdardy. Biz úshin eń bastysy – stýdentterdiń jaıly qonysta jaqsy bilim alýyna jaǵdaı jasaý. Osy joly jataqhanaǵa ornalasý tártibine ózgerister engizgimiz keldi. Endigi kezekte turǵyndar birden tórt jylǵa qonystanady. Bul birinshi kezekte, aldaǵy jyldarǵa degen senimdi nyǵaıtsa, ekinshi jaǵy stýdentterdiń kóship-qonýyna qolaıly bolmaq. Úshinshiden, bir orynda uzaq ýaqyt turý arqyly jastardyń óz turǵyn jaıyna, múlkine joǵary jaýapkershilik tanytatyndaryna senimdimin, – deıdi ýnıversıtettiń basshysy Nurlan Serǵalıev.
Prezıdent Qasym-Jomart Toqaevtyń «Ádiletti Qazaqstan – bárimiz jáne árqaısysymyz úshin. Qazir jáne árdaıym» saılaýaldy baǵdarlamasynyń 89-tarmaǵynda «Stýdenttik jataqhanadaǵy oryn tapshylyǵy máselesin sheshý» tapsyrylǵan bolatyn. «Amanat» partııasynyń 2023-2027 jyldarǵa arnalǵan «Halyqpen birge» saılaýaldy baǵdarlamasynda da «Jastarmen bir tolqynda» suranysyna sáıkes «Jastardyń ómir súrý jaǵdaıyn jaqsartý» jospary engizilgen. Osynyń bári bilim qýǵan jastardyń jaǵdaıy ýaqyt ótken saıyn jaqsara túsetinine senim uıalatady. Qazirdiń ózinde Mahambet ýnıversıtetiniń 1 526 stýdenti jataqhanamen qamtylǵan. Bilim ordasy aldaǵy ýaqytta jergilikti kásipkerlerdiń kómegimen taǵy da jańa ǵımarat qurylysyn qolǵa almaqshy.
– Mahambet ýnıversıteti – óńirdegi áleýmettik, ekonomıkalyq, ekologııalyq máselelerdi sheshý joldaryn zerdeleıtin ǵylymı ortalyq. Ǵylym men ınnovasııa salasyndaǵy jetistikteri de jyl saıyn artyp, jas ǵalymdardyń tanymaldyǵyna jol ashyp keledi. Bul – árıne, rýhy berik, birligi bekem ýnıversıtet ujymynyń eren eńbeginiń jemisi. Oblysta osy kezge deıin joǵary medısınalyq kolledj, ındýstrıaldy kolledj stýdentterin jataqhanamen qamtydyq, burynǵy transformator zaýytynyń ǵımaratyn jóndep, turǵyndarǵa baspana syıladyq. Odan soń polıtehnıkalyq kolledjge jataqhana salyp berdik. Búgin mine, Mahambet О́temisuly atyndaǵy Batys Qazaqstan ýnıversıteti janynan 500 orynǵa arnalǵan stýdentter úıin salyp otyrmyz. Jastar oqýǵa den qoıyp, elimizdiń atyn asqaqtatýǵa zor úles qosady dep senemin, – dedi oblys ákimi Narıman Tóreǵalıev.
Batys Qazaqstan oblysy