Almaty oblysynyń qaı salasynda da ilgerileýshilikpen qatar, kemshilikterdiń de bary Qonaev qalasynda ótken «Amanat» partııasy depýtattyq fraksııasynyń otyrysynda jan-jaqty baıandaldy.
Bıyl júzege asa bastaǵan «Aýyl amanaty» partııalyq jobasy aıasynda oblys aýmaǵynda jyl basynan beri 1 mlrd 968 mln teńge bolatyn 286 bıznes bastama qoldaý tapqan. Bul týraly «Amanat» partııasy Almaty oblystyq fılıalynyń tóraǵasy Qýat Baıǵodjaev depýtattyq fraksııa otyrysynda málimdedi. Onyń aıtýynsha, baǵdarlamaǵa oblystyń barlyq 133 aýyldyq okrýgi qatysyp jatyr. Biraq bekitilgen sharttarǵa sáıkes jobaǵa Qonaev, Esik, Talǵar, Qaskeleń qalalarynyń turǵyndary qatysa almaıdy.
– Bıyl óńir jurtshylyǵynan somasy 9,5 mlrd teńge bolatyn 1 300-den asa ótinim tústi. Onyń 717 ótinimi boıynsha saraptama júrgizilip jatyr. Qalǵan 619 bıznes-jospar maquldandy. Qazirgi ýaqytta 286 qaryz alýshyǵa jalpy somasy 1969 mln teńgege nesıe berildi, – dedi fılıal tóraǵasy Q.Baıǵodjaev.
Jalpy, baǵdarlama boıynsha Jambyl, Kegen, Raıymbek, Uıǵyr, Eńbekshiqazaq aýdandarynda 22 aýyl sharýashylyǵy kooperatıvi qurylǵan. Sondaı-aq ósimdik jáne mal sharýashylyǵy salasynda ázirlengen 50 joba aýyldyq eldi mekenderde halyqqa qyzmet kórsetý jospary tanystyryldy. Bul jobalarǵa qarqyndy baý-baqshany damytý, jylyjaı keshenderi, shaǵyn qus fabrıkasy, bal óndirý, jemshóp daıyndaý, jıhaz, kıim-keshek tigý jáne basqa da óndirister ashylady.
Aıta ketý kerek, «Amanat» partııasynyń saılaýaldy baǵdarlamasynda osy joba aıasynda 1 500-den asa jumys orny ashylady dep josparlanǵan bolsa, bıyl óńirdiń óndiris oshaqtarynda 450-den asa jumys orny quryldy.
Partııanyń óńirlik «Jol kartasy» aıasynda Raıymbek, Kegen, Uıǵyr aýdandarynda aýyl sharýashylyǵy ónimderin shyǵaratyn fabrıkalardy salý mindeti tur.
– Bıyl Uıǵyr aýdanynda qýattylyǵy 17,5 myń tonna qus etin óndiretin «Prıma qus» fabrıkasy ashyldy. Sonyń nátıjesinde 400 azamat jańa jumys ornymen qamtyldy. Budan bólek, aýdanda kelesi jyly qoldanysqa beriletin jylyjaıdyń qurylys jumystary júrgizilip jatyr. Úsh gektar jerdi alyp turǵan jylyjaıda 40 jańa jumys orny ashylmaq, – deıdi oblystyq aýyl sharýashylyǵy basqarma basshysynyń orynbasary Dımash Sadyqov.
Sonymen qatar Kegen aýdanynda quny 1 mlrd teńgeden asatyn et óńdeý kombınatynyń qurylys jumysy júrgizilip jatqany da atap ótildi. Tirshilik ózegi tórt túlikke baılanǵan Kegen óńirinde bir aýysymda 50 bas iri qara jáne 150 bas usaq mal etin óńdeý kombınaty ashylsa, 30 adam jumysqa ornalasady. Budan bólek, «Great Steppe Heritage» JShS baqtaq (forel) sharýashylyǵyn ashýdy josparlap otyr. Onda 20 adam jumys ornymen qamtamasyz etiledi.
«Amanat» partııasy Almaty oblystyq fılıalynyń tóraǵasy Raıymbek aýdanynda da baqtaq sharýashylyǵyn keńeıtý jumystary júrgizilip jatqanyn aıtty. Sonymen qatar bıyl aýdanda sút óńdeý, balyq jáne omarta sharýashylyǵynyń ıeleri 50-den asa azamatty jumyspen qamtyǵan. Bul jumystar aldaǵy ýaqytta da jalǵasyn tabady. Sondaı-aq óńirde 2027 jylǵa deıin partııanyń saılaýaldy baǵdarlamasy aıasynda 6,9 myń gektar sýarmaly jerdi qalpyna keltirý josparlanyp otyr.
Aýyl sharýashylyǵy basqarmasy basshysynyń orynbasary Dımash Sadyqovtyń aıtýynsha, aýyl sharýashylyǵy maqsatyndaǵy sýarmaly jerlerdiń aýdany 263,8 myń ga quraıdy. Al onyń ishinde sýarmaly egistik 240 myńǵa jýyq gektar. Búgingi tańda sýarý jelileri men sý sharýashylyǵy nysandarynyń 60-70 paıyzy tozǵan.
– Bul máseleni sheshý úshin ákimdik ótken jyldan bastap aınalymnan shyǵyp qalǵan 54,1 myń ga sýarmaly jerlerdi qalpyna keltirýge múmkindik beretin sýarý jelilerin qaıta jańǵyrtý boıynsha sharalar qabyldanyp jatyr, – deıdi basqarma basshysynyń orynbasary.
Aıta ketý kerek, «Amanat» partııasynyń saılaýaldy baǵdarlamasynda Jambyl, Ile, Talǵar aýdandarynyń sýarý jelilerin qaıta jańartý mindeti tur. Jalpy, úsh jobanyń jalpy quny – 64,4 mlrd teńge. Bıyl oǵan 3 mlrd teńge qarajat bólingen.
Jobalar tolyq iske asyrylǵan jaǵdaıda aınalymǵa 22 myńǵa jýyq gektar paıdalanylmaıtyn sýarmaly jerlerdi engizý josparlanǵan. Agrarly oblysta bıyl lızıng arqyly 3 mlrd 851 mln teńgege 269 tehnıka satyp alynǵan. Búgingi kúnge óńirdegi aýyl sharýashylyǵy tehnıkalarynyń tozý kórsetkishi 58,8 paıyzdy quraıdy eken.
Oblys boıynsha aýyl sharýashylyǵy tehnıkasynyń barlyǵy – 13 415. Onyń ishinde 10 jyldan asa paıdalanǵan 8 myńǵa jýyq tehnıka tozǵan, deıdi D.Sadyqov.
Jalpy, ınvestısııalyq salymdar negizinde satyp alynǵan tehnıkanyń 25 paıyzy jáne suranysqa ıe aýyl sharýashylyǵy tehnıkasynyń 30 paıyzy memleket bıýdjetinen sýbsıdııalanady.
Depýtattyq fraksııa otyrysynda sóz alǵan oblystyq densaýlyq saqtaý basqarmasynyń basshysy Lázzat Aqtaeva óńir aýmaǵynda 6 jańa medısınalyq nysan salynyp jatqanyn atap aıtty. Sondaı-aq 2025 jylǵa deıin «Aýyldyq densaýlyq saqtaýdy jańǵyrtý» ulttyq jobasy aıasynda 40-qa jýyq mekeme boı kóteretini josparlanǵanyn jetkizdi.
Basqarma basshysynyń aıtýynsha, bıyl dárigerlik uıymdardyń materıaldyq-tehnıkalyq bazasyn nyǵaıtýǵa 5 mlrd teńgeden asa qarjy qarastyrylǵan.
Oblysta bilim berý sapasyn kóterýge de erekshe nazar aýdarylyp keledi. Bıylǵy oqý jylynda 9 jańa mektep qoldanysqa berilse, jyl sońyna deıin taǵy 5 mekteptiń qurylysy aıaqtalady. Oǵan qosa 16 nysanda kúrdeli jóndeý jumystary júrgizilip jatqany belgili, onyń ekeýi aıaqtalǵan. Bul jumystarǵa bıýdjetten 13 mlrd teńgege jýyq qarjy bólingen. Depýtattar óz kezeginde bilim berý nysandarynda jumys qarqynyn jyldamdatý qajettigin qulaǵdar etti.
О́ńirde úsh aýysymdyq máselesin joıý úshin «Jaıly mektep» ulttyq jobasy aıasynda eki jyldyń ishinde 54 600 oryndyq 53 jańa mektep salyný josparlanyp otyr. Sonymen qatar mektepke deıingi tárbıemen qamtý maqsatynda 5 myń orynǵa jýyq 59 jekemenshik balabaqsha jáne qosymsha toptar ashý kózdelgen.
Alqaly jıynda oblystyń ózge de basqarma basshylarynyń atqarylyp jatqan jumystary týraly esepteri tyńdalyp, syn-eskertpeler nazarǵa alyndy.
Almaty oblysy