Premer-mınıstr Álıhan Smaıylov 22-28 qazan aralyǵynda Qytaıdyń Hanchjoý qalasynda ótken IV Azııa Para oıyndarynyń jeńimpazdarymen jáne júldegerlerimen kezdesti, dep habarlaıdy Egemen.kz Úkimettiń baspasóz qyzmetine silteme jasap.
Jarysta Qazaqstan atynan para paýerlıftıng, bochcha, para jeńil atletıka, para velosport, akademııalyq eskek esý, para dzıýdo, otyryp oınaıtyn voleıbol, para ústel tennısi, shahmat, para oq atý, para sadaq atý, para taekvondo, para júzý jáne para kanoe sııaqty 14 sport túrinen 131 sportshy qatysqany málim. Nátıjesinde el quramasy 8 altyn, 12 kúmis, 21 qola, barlyǵy 41 medal jeńip aldy. Medal sany boıynsha Qazaqstan 44 qatysýshy el arasynda 11-shi orynǵa joǵarylady.
Kezdesý barysynda Álıhan Smaıylov Memleket basshysy Qasym-Jomart Toqaevtyń alǵys hatyn oqyp, otandyq paralımpıada oıynshylaryn ótken Para oıyndaryndaǵy jarqyn jeńisterimen quttyqtady.
«Sizderdiń boılaryńyzdaǵy janqııarlyq rýh pen jeńiske degen qushtarlyq mıllıondaǵan adamdardy ómirdegi qıyndyqtardy eńserýge jáne tabysqa jeteleıdi. Sizderdiń keremet sporttyq ónerlerińiz adamnyń erik-jigeriniń sheksiz ekenin pash etti. Sizderdiń árqaısylaryńyzdyń ómir joldaryńyz – óskeleń urpaq úshin sheberliktiń, batyldyqtyń, sondaı-aq tabandylyqtyń úlgisi. Onsyz, árıne joǵary sporttyq nátıjelerge qol jetkizý múmkin emes», dedi Premer-mınıstr.
Álıhan Smaıylovtyń aıtýynsha, jetistikke jetý jolynda paralımpıadashylarǵa qoldaý kórsetken tálimgerler men jattyqtyrýshylar da erekshe qurmetke laıyq.
«Sizder tabysqa jetý jolynda talmaı kúrestińizder. Azııa Para oıyndaryndaǵy búgingi jeńister – bolashaq Paralımpıada jetistikteri úshin mańyzdy qadam», dedi ol.
Úkimet basshysymen kezdesýge qurlyqtyq jarystardyń jeńimpazdary Davıd Degtıarev (para paýerlıftıng), Nurdáýlet Jumaǵalı jáne Dıas Kenjebek (para júzý), Aqmaral Naýatbek, Erǵalı Shameı jáne Oljas Orazalyuly (para dzıýdo), Dastan Muqashbekov (jeńil atletıka) qatysty.
Azııa rekordshysy Nurdáýlet Jumaǵalı mundaı iri jarys alańynda óner kórsetý árqashan úlken jaýapkershilik júkteıtinin atap ótti.
«Jattyǵý barysynda biz barlyq tapsyrmalardy buljytpaı oryndadyq. Jarys aldynda daıyndyǵymyz joǵary deńgeıde ótti. Azııa Para oıyndarynda búkil qazaq eliniń qoldaýyn erekshe sezindim. Barlyq sportshylardyń atynan, Qazaqstan halqyna zor alǵysymdy bildiremin. Aldaǵy Paralımpıada oıyndarynda elimizdiń ánuranyn shyrqatýǵa bar kúshimizdi salamyz», dedi ol.
Para dzıýdoshy Aqmaral Naýatbek Azııa Para oıyndary otandyq sportshylar úshin Paralımpıada aldyndaǵy úlken synaq bolǵanyn atap ótti.
«Bizdiń jetistigimiz – barlyq jattyqtyrýshylar men medısına qyzmetkerleriniń birlesken eńbeginiń nátıjesi. Barlyq sportshylardyń atynan aldaǵy Paralımpıada oıyndaryna tyńǵylyqty daıyndalyp, elimizdi jaqsy jetistiktermen qýantamyz dep tolyq senimmen aıtamyn», dedi ol.
Kezdesý barysynda Álıhan Smaıylov Azııa Para oıyndarynyń jeńimpazdary men júldegerlerine, sondaı-aq olardy daıyndaǵan jattyqtyrýshylarǵa Memleket basshysynyń atynan alǵys hattar men estelik syılyqtaryn tabys etti. Qazaqstannyń Paralımpıadalyq dzıýdo federasııasy da Prezıdenttiń alǵys hatymen marapattaldy.