Armenııanyń Erevan qalasynda sambo kúresinen ótken dúnıe chempıonatynda jerlesimiz Araılym Ábenova álem chempıony atandy, dep habarlaıdy Egemen.kz Týrızm jáne sport mınıstrligi Sportty damytý dıreksııasynyń baspasóz qyzmetine silteme jasap.
Asa aýyr salmaqta kúresken Araılym Ábenova shırek fınalda Sıdneı Sı degen balýannan basym tústi. Jartylaı fınalda Blanka Prodan esimdi qarsylasyn jyqty. Fınaldyq saıysta reseılik qazaq Janara Qusanovany da aıqyn utty. Qazaq qyzdaryna buǵan deıin asa aýyr salmaqta sambodan álem chempıonatynyń altyny buıyrǵan emes. Osy olqylyqty Araılym bútindedi. Qazaqstan sportshylary sambo kúresinen álem chempıonatyna 1992 jyldan beri turaqty túrde qatysyp, 30 jyldyń ishinde 27 altyn medal ıelendi.
Erevan tórinde elimizdiń balýandary 1 altyn, 2 kúmis, 5 qola medal aldy. Kelesi jyly sambo kúresinen álem chempıonaty Astana qalasynda ótedi.