29 qarasha men 2 jeltoqsan aralyǵynda Kosovonyń astanasy – Prıshtınada fýtzaldan ÝEFA Chempıondar lıgasynyń elıtalyq kezeńiniń oıyndary ótedi.
Keshe jarys kestesi jarııalandy. V tobynda óner kórsetetin Almatynyń «Qaıraty» tusaýkeser kezdesýin 29 qarashada jergilikti «Prıshtınaǵa» qarsy ótkizedi. Kelesi kúni Portýgalııanyń «Benfıka» klýbymen kúsh synasady. Sońǵy matchta Slovenııanyń «Dobovesimen» sheberlik baıqasamyz. Osylardyń arasyndaǵy eń azýlysy «Benfıka» ekeni daýsyz. 2001 jyly Pıreneı túbeginde jasaqtalǵan komanda el birinshiligi, el kýbogi jáne sýperkýboktiń árqaısysyn segiz retten oljalady. 2009/2010 jylǵy maýsymda Chempıondar lıgasynda qarsylas shydatpady.
Al «Prıshtına» men «Doboves» óz memleketteriniń mańdaıaldy komandalary sanalǵanymen, halyqaralyq arenada olar aýyz toltyryp aıtarlyqtaı kórsetkishke qol jetkize alǵan joq.