Senator Lázzat Qaltaeva Irlandııanyń Dýblın qalasynda ótip jatqan «Múgedek adamdardyń saıası iske qatysýy» saraptamalyq tobynyń jyl saıynǵy kezdesýine qatysty.
Kezdesýdi Irlandııa Parlamentiniń qoldaýymen EQYU DIAQB uıymdastyryp otyr. Kezdesýge Irlandııa Parlamenti palatalarynyń depýtattary, onyń ishinde Múgedektik máseleleri jónindegi komıtettiń tóraǵasy qatysty. Múgedektigi bar adamdardyń quqyqtary máselelerin damý jáne halyqaralyq qatynastar saıasatyna engizý, sondaı-aq EQYU elderi Parlamentteriniń ınklıýzııany baǵalaý ádistemesi jáne múgedektigi bar adamdardyń saıası iske qatysýyn ilgeriletý jóninde Parlamentterge arnalǵan oqý kýrsyn ázirleý jaıy talqylandy.
Senator Qaltaeva óz kezeginde Qazaqstannyń saılaý quqyqtaryn iske asyrý jóninde múgedektigi bar adamdardyń teń múmkindikterin qamtamasyz etý salasyndaǵy zańnamany jetildirý tájirıbesi týraly aıtyp berdi. Ol osyǵan baılanysty saılaý ýchaskeleriniń qoljetimdiligin qamtamasyz etý, áıelderge, jastarǵa jáne múgedektigi bar adamdarǵa 30 paıyz kvota engizý týraly kezdesýge qatysýshylardy habardar etti. Ol sondaı-aq «Saılaý týraly» jáne «Saıası partııalar týraly» zańdarǵa ózgerister engizilgennen keıin Parlament Májilisine – 6, al barlyq deńgeıdegi máslıhattarǵa 71 múgedektigi bar depýtat saılanǵany týraly aqparat berdi.
«Bul derekter, saıası reformalar barlyq azamattardyń, sonyń ishinde múgedektigi bar jandardyń quqyqtaryna áser etkenin kórsetedi. Senatta múgedektigi bar otandastarymyzdyń ózekti máselelerin talqylaý, zańnamalyq deńgeıde sheshimder ázirleý jáne olardyń oryndalýyn baqylaý alańy bolyp tabylatyn Inklıýzııa jónindegi keńes quryldy», dep atap ótti Lázzat Qaltaeva.