Taıaýda Temirtaýdaǵy «Ekspress» bazarynda shaǵyn aýylsharýashylyq jármeńkesi ótti. Onda Buqar jyraý, Osakarov aýdandarynyń sharýashylyqtary ákelgen mal men qus, baý-baqsha ónimderi qala turǵyndaryna naryqtaǵy baǵadan 15-20 paıyz arzanǵa saýdalandy. Osylaısha, qysqy azyǵyn qamdap alǵan qala jurty shaǵyn jármeńkeniń sharapatyn sezindi.
Jármeńkede Buqar jyraý aýdanynyń sharýashylyqtary 8,5 tonna mal etin, 1,3 tonna qus etin, 1,5 tonna sút ónimderdin, 50 myń dana jumyrtqa, 8 tonna kartop, 1,5 tonna sábizdi saýdaǵa shyǵardy. Al Osakarov sharýalary 6,5 tonna et, 20 tonna kartop, 2 tonnadan sábiz, oramjapyraq, sút ónimderin satty.
Dala dámi bazardaǵy baǵadan áldeqaıda tómen saýdalandy. Máselen, sıyr etiniń ár kılosy – 2 300, jylqy – 2 600, kartop – 100, jumyrtqanyń 10 danasy 430 teńgeden satylyp, temirtaýlyqtar olardy molynan satyp alyp, qorjyndaryn toltyryp jatty.
Jármeńkege 2 sıyr men 1 jabaǵynyń ushasyn ákelgen Osakarov fermeri Baıbolat Úrimhannyń jabaǵysy ertemen ótip ketipti. Qala turǵyny Raıhan Qaıyrbekova sıyrdyń jarty etin ólshetip aldy.
«Aýyldan kelgen azyq-túliktiń qunary mol, ekologııalyq taza dep sanaımyz. Mine, semiz sıyrdyń jarty etin satyp aldym. Bir qysqa jetedi. Baǵasy da bazardaǵydan arzan», deıdi R.Qaıyrbekova.
Al Buqar jyraý aýdanynyń sórelerinen tor qaltalaryn toltyryp alyp jatqan jurttyń kóńili toq, júzi shat. Saýdager de máz, dala dámine qaryq bolǵan qala jurty da qýanyshty. Onymen qosa qalanyń ulttyq-mádenı ortalyqtary ónerpazdarynyń jármeńke basyndaǵy konserti de kópshiliktiń kóńilinen shyǵyp jatty.
Tańerteńnen qyzǵan jármeńkeniń saýdasy men dýmanynyń ishinde Temirtaý qalasynyń ákimi Oraz Táýirbekov bastaǵan ákimdik qyzmetkerleri osyndaǵy saýda tártibi men vetsanıtarlyq talaptardyń buzylmaı, qatań saqtalýyn jármeńke aıaqtalǵansha qadaǵalap, baqylaýda ustady.
Qaraǵandy oblysy,
Temirtaý qalasy