Hamza Esenjanov atyndaǵy Batys Qazaqstan oblystyq balalar men jasópirimder kitaphanasynda erekshe eńbektiń tusaýkeseri ótti. «Týǵan jerim Jańaqala» atty jańa jınaqtyń avtory – jergilikti ólketanýshy Tynyshtyq О́teshqalıev.
Aýylda turatyn qarapaıym eńbek ardageri týǵan jer tarıhyna qyzyǵýshylyq qalaı bastalǵanyn áńgimeleıdi.
– Bizdiń Bókeılik sovet bıligi kezinde túrli qıyndyqty kórdi ǵoı. Eki márte qurylyp, eki márte tarady. Jergilikti halyq Qazaqstannyń 19 oblysyna jáne odan tysqary jerlerge de bosyp ketti. Qum Narynnyń qasıetti de qasiretti tarıhyna áýelden qyzyǵyp júrýshi edim. 2014 jyly aýdanǵa ókil ımam bolyp kelgen Muratbek qajy Jahatov «ólketanýshylar uıymyn» qurýǵa muryndyq boldy. Sóıtip, 10 jylǵa taıaý ýaqyt ishinde 77 ret ekspedısııaǵa shyǵyppyz. 45 myń shaqyrymnan asa jol júrippiz. Bul degen – ekvatordy aınalyp shyqqannan da artyq qashyqtyq qoı, – deıdi Tynyshtyq aǵa.
Shynynda da jergilikti on adamnan qurylǵan jańaqalalyq ólketanýshylar uıymy Qum Narynnyń qoınaýyn ábden sharlap, talaı eski qonysty, tarıhı jerdi, kóne zıratty anyqtaǵan. Joǵarydan nusqaýsyz, óz qaltalarynan shyǵarǵan 10 myń teńgelik jarnaǵa kólik jaldap, janarmaı alyp, saparǵa attana beretin jankeshti toptyń aqsaqaly Qabdyǵalı Tekebaevtyń jasy 90-ǵa taıap qaldy. Kópshiligi zeınetker bolsa da baba tarıhy degende sergek, qulshynyp tur. Top jetekshileriniń biri Tynyshtyq О́teshqalıuly bıyl 70-ke tolǵan. Qazaqstan Respýblıkasy Mádenıet jáne aqparat mınıstrligi bekitken «Úzdik ólketanýshy» tósbelgisin alyp, respýblıkalyq forýmǵa da qatysyp keldi.
«Búgin shyqqan kitap biz jınaǵan derek-tarıhtyń besten biri ǵana. 1892 jyly Bókeıliktiń shejiresin 12 adam jazǵan eken, túpnusqasy qolymda tur. Bizdi tósekte tynysh jatqyzbaı júrgen – keler urpaqqa, nemere-shóberemizge qandaı úlgi-ónege qaldyramyz? – degen oı ǵoı. Týǵan jerdiń tarıhyn tereń bilgen óren ony súıe de biledi, Otanynyń patrıoty bolady. Bizdiń maqsatymyz osy» deıdi avtor.
– Kez kelgen jańa kitap – oqyrman qazynasy. Bizdiń kitaphananyń tiregi de Tynyshtyq О́teshqalıev syndy bastamashyl jandar ǵoı. Jas oqyrmandarymyz jańa kitapty oqyp, Qum Narynnyń qasıetin tereń bile túsedi dep oılaımyn, – deıdi osy is-sharany uıymdastyrýshy, Hamza kitaphanasynyń jurtshylyqpen baılanys jáne buqaralyq jumys bóliminiń basshysy Gúlnaz Hamzına.
Batys Qazaqstan oblysy