2-3 jeltoqsan kúnderi Ulybrıtanııanyń Manchester qalasynda taekvondodan álemdik Gran-prıdiń fınaldyq dodasy ótedi, dep habarlaıdy Egemen.kz Týrızm jáne sport mınıstrligi Sportty damytý dıreksııasynyń baspasóz qyzmetine súıenip.
Bul básekede Olımpıada baǵdarlamasyna kiretin 8 salmaqta 38 memleketten jınalǵan 128 tańdaýly sportshy baǵyn synaıdy. Ár salmaqta 16 úzdik medal úshin aıqasady. Gran-prı dodasynda ıelengen upaılar Parıj Olımpıadasyna qatysý múmkindigin arttyrady.
Elimizden Manchesterge tek bir ǵana taekvondoshy barady. Ol – 67 keliden joǵary salmaqtaǵy Jansel Denız. Djakartadaǵy Azıadanyń kúmis (2018), Hanchjoýdaǵy jazǵy Azııa oıyndarynyń qola júldegeri qazir olımpıadalyq reıtıngte 14-satyda tur. Jansel bıyl Bakýde ótken álem chempıonatyna 73 kg salmaqta qatysyp, shırek fınalda álem birinshiliginiń qola júldegeri reseılik Polına Hanǵa ese jiberdi.