Ortalyq kommýnıkasııalar qyzmetinde ótken brıfıngte Túrkistan oblysynyń ákimi Darhan Satybaldy Qoja Ahmet Iаsaýı kesenesine lańkestik áreket jasalmaq bolǵanyn aıtty. Osy oqıǵadan keıin ákimdik kesenege strategııalyq mártebe berýdi surap Úkimetke arnaıy hat joldaǵan, dep jazady Egemen.kz.
Túrkistan oblysynyń ákimi kesene aýmaǵynda terakt jasaý áreketi qaıtalanbasyna eshkim kepildik bere almaıtynyn tilge tıek etti. Osyǵan oraı, túrki jurty úshin mańyzdy keseneni erekshe kúzetpen qamtamasyz etý suralǵan.
«Terakt jasaý áreketi aqpan aıynda boldy. Men ózim BAQ-taǵy aqparattyń arqasynda bildim. Meniń málimetim boıynsha, mundaı áreketti Tájikstan azamaty, sheteldiń azamaty jasamaq bolǵan kórinedi. Ol basqa aǵymnyń jaqtaýshysy bolýy múmkin. Nege mundaı áreketke barǵanyn bilmeımin, aıta almaımyn. Biz Úkimetke keseneni strategııalyq nysandar tizimine qosýdy surap hat joldadyq. Tizimge engizilgennen keıin arnaıy kúzetpen qamtamasyz etilip, qaýipsizdik sharalary júrgiziledi», dedi Darhan Satybaldy.