Aldaǵy kúnderi belsendi Atlantıkalyq sıklon jyrasymen jáne onymen baılanysty atmosferalyq frontaldy bólimderdiń áserinen Qazaqstannyń basym bóliginde qar men jańbyr kútiledi, dep habarlaıdy Egemen.kz «Qazgıdromet» RMK-ǵa silteme jasap.
«3 jeltoqsanda soltústik-batysta jáne soltústikte, 3-4 jeltoqsanda shyǵysta, 4 jeltoqsanda elimizdiń ońtústik-shyǵysyndaǵy taýly aýdandarda qatty jaýyn-shashyn kútiledi. Jaýyn-shashynmen qatar respýblıkanyń soltústik jartysynda kóktaıǵaq qubylystary men burqasyn bolady dep kútiledi. Respýblıka boıynsha tuman, jel 15-29 m/s, elimizdiń soltústik-batysynda jáne soltústiginde ekpini keı ýaqyttarda 30 m/s jáne odan asa kútiledi», delingen habarlamada.
Sonymen qatar 4 jeltoqsannan bastap soltústik-batys antısıklonynyń jotasymen sýyq aýa massalarynyń enýi kútiledi, bul Qazaqstannyń basym bóliginde aýa temperatýrasynyń kúrt tómendeýine ákeledi.
Soltústik-batys jáne soltústikte túngi saǵattarda 7-21 gradýs aıazǵa deıin, al respýblıkanyń ortalyǵy men shyǵysynda 5-15 gradýs aıazǵa deıin tómendeýi kútiledi. Ońtústik óńirlerde 0-5 gradýs aıazǵa deıin shamaly tómendeýi boljanady.