Qazirgi tańda Almaty oblystyq «Jastar rýhy» jastar qanatynyń qatarynda 200-den astam volonter bar. Jaqsylyq jasaýǵa nıetti jastardyń qatary ýaqyt ótken saıyn kóbeıip keledi.
Solardyń biri – 20 jastaǵy Nurbek Ergeshbaı «Amanat» partııasy janyndaǵy «Jastar rýhy» jastar qanatynyń volonteri retinde birqatar izgi isterdiń bel ortasynan kórinip júrgen jas. Jas ta bolsa jaqsylyq jasaýǵa qumar ol volonterlik jumystarǵa atsalysýdy 2019 jyly bastaǵan. Sodan beri óńir aýmaǵynda «Jastar rýhy» jastar qanatynyń uıymdastyrýymen «Ardagerlerdi ardaqtaıyq», «Kedergisiz keleshek», «Qýanysh syıla», «TazaLike» ekologııalyq aksııasy jáne «Qaýipsiz qoǵam» atty is-sharalarǵa belsene atsalysyp keledi.
Nurbek alǵashqy volonterlik jumysyn órtten zardap shekken Qostanaı jurtyna kómek berýden bastaǵan. Qala turǵyndary men qoǵam belsendileriniń ákelgen árbir zattaryn iriktep, mejelegen jerge jetýin qadaǵalaǵan jas óziniń atynan da kıim-keshek pen tósek jabdyqtaryn jiberip, gýmanıtarlyq kómek kórsetýde aıanyp qalmaǵan. Sodan beri qaıyrymdylyq jasaý, qınalǵanǵa qolushyn berýden jańylǵan emes.
«Kedergisiz keleshek» jobasy aıasynda az qamtylǵan otbasylarǵa azyq-túlik sebetterin jetkizý jáne «Qýanysh syıla» aksııasy aıasynda múmkindigi shekteýli balalarǵa syılyqtar aparyp, konserttik baǵdarlamalar jasaý arqyly qamkóńil balalardy qýantqan.
Sondaı-aq «TazaLike» ekologııalyq aksııasynda da volonterler Qonaev atalarynyń esimi berilgen qalanyń tazalyǵyn saqtap, ár apta saıyn senbilikter jasaýdy qolǵa alǵan. «Jastar rýhy» jastar qanatymen birge «Tańbaly tas» atty tarıhı oryndy tazalaýǵa 100-den asa volonter qatysqan.
«Jastar arasynda beleń alyp otyrǵan keleńsiz máselelerdiń biri – zorlyq-zombylyq jáne vandalızm. Osy jaǵdaıǵa baılanysty Qonaev qalasynyń jergilikti polısııa basqarmasymen birlesip, túngi jáne kúndizgi reıdtterge shyǵamyz. Volonterlik jumys óte qyzyq, qanshama janǵa kómek kórsetesiń, olardyń alǵysyn alasyń. «Batamen el kógerer, jańbyrmen jer kógerer» demekshi, úlkenderdiń batasyn alyp jumysymyzdy júrek qalaýymen atqaramyz», degen N.Ergeshbaı volonterlik jumysty atqara júrip partııa jáne Memleket basshysynyń Alǵyshattarymen marapattalǵanyn da maqtanyshpen jetkizdi.
Almaty oblysy