Jigerli jeter jeńiske

Elimizdiń Qorǵanys mınıstriniń kýbogi sarapqa salynǵan básekege qazaq sportshylarymen qatar Reseı Federasııasy, О́zbekstan jáne Belarýs respýb­lıkalarynyń saıypqyrandary baq synady. Solardyń biri – 57 kg salmaqta týrnır chempıony atanǵan Jandos Madehııanov.

Kez kelgen eldiń áskeri qarý-jaraǵynyń kúsh­tiligimen ǵana emes, sonymen qatar jaýyn­ger­leriniń dene daıyndyǵymen de qýatty. Osy maq­satta 2018 jyly qoıan-qoltyq urys áskerı qyzmetkerler úshin min­detti áskerı dene daıyn­dyǵy baǵdar­lamasyna engizildi. Bul jekpe-jek óneriniń túrleri yqylym zamannan beri de kóptegen elde jaýyngerlerdi tárbıeleý, shy­nyqtyrý júıesi retinde qoldanylǵan. Keıingi ǵa­syrlarda qarý-jaraq pen tehnıkanyń damýy­men mańyzy tómen­degenine qaramastan, áli kú­nge kúshtik qurylymdardyń jaýyngerlerin daıar­laýdyń mańyzdy quramdas bóligi bolyp qalyp otyr.

Bilegi myqty, júregi túkti jan­darǵa arnalǵan sportty janyna serik etken keıipkerimiz, ha­lyq­aralyq ja­rystyń sý jańa chempıony serjant Jandos Madehııanov Qaraǵandy oblysynyń Qar­qaraly aýdanynda dúnıege kelgen. Qaraǵandy qala­syndaǵy №61 orta mekteptiń túlegi. Sportpen 16 jasynan kásibı túrde aınalysyp keledi. Qoıan-qol­tyq urystan, kıkboksıngten, ýshý-sandadan sport sheberi. Osy úsh sport túrinen de el chempıo­ny.

Qorǵanys mınıstriniń kýbogi jolyn­daǵy jarys­tarǵa tórt jyl qatary­nan qatysyp, bıyl jeńisti qoldan bermedi. Alǵashqy jyly qatysqan týrnırde 3-oryn, odan keıin 2-oryn, byltyr 3-oryn alǵan edi. Bıyl kópten kútken jeńis tuǵyrynan kórindi. Sportta jeńimpaz bolý ońaı emes. Ol úshin adamǵa temirdeı tabandylyq pen minez kerek.

«Sońǵy qarsylasym – úsh dúrkin Qazaqstan chempıony, úsh dúrkin álem chempıony. Sondyqtan odan aılamdy asyrý úshin barymdy saldym. Buǵan deıin mınıstrdiń kýbogi úshin ótken týrnırde jáne Qazaqstan chempıonatynda odan eki ret utylǵan edim», deıdi Jandos.

Áskerge kelgen soń armııalyq qoıan-qoltyq uryspen shuǵyldana bastaǵan oǵan jalpy jekpe-jek tehnıkasy jaqsy tanys. О́ıtkeni bul sport túri de jaýyngerdi shyńdaıtyn, qolmen, aıaqpen soqqy jasap, laqtyrý, kúresý ádisterine negizdelgen. «Aldaǵy maq­satym – qoıan-qoltyq urystan álem chempıony atanyp, halyqaralyq dárejedegi sport sheberi ataǵyn alý», deıdi Jandos.