Ádiletti Qazaqstandy qurý maqsatynda Bas prokýratýraǵa bıznes salasyndaǵy zańsyzdyqtardyń jolyn kesý mindeti júktelgen. Sonyń bir baǵyty – mańyzdy ınvestısııalyq jobalarǵa qoldaý kórsetý.
Osy maqsatta Aqtóbe oblystyq prokýratýrasynyń bazasynda front-keńse qurylyp, problemalyq máselelerdi tıimdi sheshý, ınvestorlardyń quqyqtary men zańdy múddelerin qalpyna keltirý baǵytynda jumys júrgizip jatyr. Taıaý kúnderi oblys prokýratýrasy front-keńse arqyly kelip túsken «Qazgeorýd» JShS-ǵa qatysty problemalyq keısti qarady.
Bul ınvestor Hromtaý aýdanynda 45 mlrd teńge ınvestısııany quraıtyn mys jáne myrysh óndirý boıynsha «Lımannoe» ken ornyn ıgerý iri jobasyn iske asyryp keledi. Bir jarym jyl boıy ınvestordyń jol qurylysyna jer ýchaskesi bólinbegendikten, jobany damytýǵa múmkindigi bolmaǵan. Jol salý qajet bolǵan aýmaq 18 sharýa qojalyǵynyń jer ýchaskeleri arqyly ótkendikten, olar qurylys jumystaryn júrgizýge kelispeıtinin bildirgen.
Prokýratýranyń aralasýymen aýdan ákimdigi jáne basqa da múddeli memlekettik organdar sharýa qojalyqtarynyń basshylarymen atalǵan jer ýchaskelerin satyp alý boıynsha kelissózder júrgizdi. Nátıjesinde, ınvestor men qojalyq ıeleri arasynda kelisimge qol jetkizilip, qajetti jer ýchaskeleri memlekettiń jer qoryna qaıtaryldy. Búgingi tańda jer komıssııasynyń oń qorytyndysymen avtojol salý úshin jer ýchaskelerin berý týraly sheshim qabyldandy.
Osy oraıda prokýratýrada bıznesti qorǵaý maqsatynda ınvestorlar men kásipkerlerdiń quqyqtaryn qorǵaý jónindegi mobıldi top jáne CALL-ortalyq jumys isteıtinin eske salamyz. Bıznes sýbektileri (ınvestorlar, kásipkerler) qıyndyqtarǵa tap bolǵan jaǵdaıda, ózderiniń buzylǵan quqyqtary men múddelerin qorǵaý jáne qalpyna keltirý úshin prokýratýra organdaryna júgine alady.