Bıyl elimizdiń sportshylary halyqaralyq saıystardan 586 medal oljalady. San jaǵynan saralaǵanda az tabys emes. Olımpıadalyq sport túri boıynsha 121 altyn, 111 kúmis, 141 qola medal ıelendi. Olımpıadalyq sport sanatyna enbeıtin saıystardan 118 medal buıyrdy. Para sportshylar bıylǵy jyly aıtýly saıystardan 33 altyn, 33 kúmis, 27 qola medal aldy.
Bıyl boksshylarymyz О́zbekstanda ótken álem chempıonatynda 4 altyn, 1 kúmis medalǵa qol jetkizip, jalpykomandalyq esepte 2-satyǵa turaqtady. Dese de Tashkent shárinde ótken álem chempıonatyna keıbir el álemdik saıasattyń salqyny tıetindikten boksshylaryn jibergen joq. Kóktemde osyndaı tolaıym tabysqa jetken jýan judyryq jigitter qońyr kúzde jazǵy Azııa oıyndarynda oısyraı utylǵany eńsemizdi eńkeıtti.
Semserlesýden Italııada ótken álem chempıonatynda Rýslan Qurbanov qazaq sportynyń tarıhynda tuńǵysh ret qola medal ıelendi.
Túrkııada ótken álem kýboginde komandalyq saıysta Qazaqstan quramasy tuńǵysh ret jeńiske jetti. Rýslan Qurbanov, Elmır Álimjanov, Erlik Sertaı, Vadım Sharlaımov bastaǵan semserlesýshiler álem kýboginde barlyq qarsylasty aıqyn utty. Semserlesýshiler Qytaıdyń Hanchjoý qalasynda ótken jazǵy Azııa oıyndarynan kúmis medalmen oraldy.
Karateshiler Azııa chempıonatynda jalpykomandalyq esepte kósh bastady, stend atý men nysana kózdeýde mergenderimiz álem kýboginde oljalaǵan medal sany boıynsha top bastady.
Jekeleı synda Ásem Orynbaı Qatardyń Doha qalasynda ótken álem kýboginiń fınaldyq kezeńinde altyn medal ıelendi. Hanchjoýdaǵy jazǵy Azııa oıyndaryndarynda qola júldege qol jetkizdi.
Nysana kózdep atýdan Ázerbaıjanda ótken álem chempıonatynda Fatıma Ernazarova men Aleksandra Sádýaqasova jeńiske jetti. Mergenderimiz Bakýdegi álem chempıonatynan 2 altyn, 2 kúmis, 1 qola medal enshilep qana qoımaı komandalyq saıysta top jardy.
Grek-rım, erkin hám áıelder kúresinen de balýandarymyz jastar men eresekter arasynda ótken Azııa chempıonaty, álem birinshiligi syndy aıtýly dodalar men halyqaralyq týrnırlerde olja saldy.
Kúrestegi jetistikti aıtqanda 92 keli salmaqta álem chempıony atanǵan Rızabek Aıtmuhannyń abadan eńbegin aıyryqsha ataý kerek. Erkin kúresten qazaq eliniń tuńǵysh álem chempıony. Kúrestiń osy túri qazaq dalasyna qazyǵyn qaqqanyna 70 jyldyń júzi desek, álem chempıonatynyń altyny buıyrmaı keldi. Osy ketikti bútindegen tuńǵysh balýan Rızabek Aıtmuqannyń eńbegi «Jyldyń úzdik sportshysy» atalymyna tatymapty-mys, sodan keıin «Sporttaǵy úzdik serpin» atandy. Serbııanyń Belgrad qalasynda ótken álem chempıonatynda erkin kúresten Azamat Dáýletbekov pen áıeder kúresinen Jámıla Baqbergenova qola medal ıelendi. Grek-rım kúresiniń balýandary jappaı jeńilip álem chempıonatynan medalsiz qaıtty.
Dzıýdo kúresinen áıelder arasynda Ábıba Ábýjaqynova tuńǵysh ret Gran-prı dodasynda top jardy. Qazaqtyń qos qyzy álemdik dodanyń fınalynda kúresip, Ǵalııa Tynbaevaǵa kúmis medal buıyrdy.
Astana qalasynda alǵash ret ǵalamdyq Grand Slam týrnıri ótti. Balýandarymyz 1 altyn, 1 kúmis, 5 qola medal ıelendi. 60 kelide Maǵjan Shamshadın jeńiske jetti, 66 keli salmaqta Ǵusman Qyrǵyzbaev kúmis medal aldy. Dzıýdoshylarymyz bıylǵy jyly 27 medal ıelendi. Onyń ishinde 2 altyn, 8 kúmis, 17 qola júlde bar.
Fýtboldan Qazaqstan ulttyq quramasy kelesi jyly Germanııa eli ótkizetin Eýropa chempıonatynyń irikteý týry aıasynda tolaıym tabysqa jetti. Júz jyldan asa tarıhy bar qazaq fýtboly Eýropa chempıonaty, álem birinshiligine irikteý bolsyn dál bıylǵy deńgeıge jete alǵan emes. Reseılik maman Magomed Ádıev baptaıtyn ulttyq qurama irikteý týry aıasynda ótkizgen 6 matchta jeńiske jetti, 4 oıynda jeńilis tapty. Dese de áli de Eýropa chempıonatyna qatysý múmkindigi bar. Ol úshin keler jyldyń kókteminde aldymen 2004 jylǵy Eýropa chempıony Grekııa quramasyn utýy tıis.
Sportshylarymyz kúshin keler jyldyń basty dodasy – Parıj jazǵy Olımpıada oıyndary men paralımpıadasynda synaıdy.