Mádenıet jáne aqparat mınıstri Aıda Balaeva Memleket basshysynyń tapsyrmasy negizinde Ulttyq ekonomıka jáne Qarjy mınıstrlikterimen birlesken jumystyń nátıjesin bólisti, dep jazady Egemen.kz.
Mınıstrdiń málim etýinshe, endi shyǵarmashylyq sýbektilerge salynatyn salyq jeńildetiledi.
«Osy keshendi jumystyń nátıjesinde Úkimet ( QR ÚQ #1240 29.12.2023j.) qaýly qabyldady. Qaýlyǵa sáıkes 40 qyzmet túri arnaıy bólshek salyq rejımine ótti. Bul degenimiz bıznes KTS, jeke tabys salyǵy, QQS tóleýden bosatylǵanyn bildiredi. Atalǵan qyzmet túrlerimen aınalysatyn sýbektiler endi biryńǵaı salyqty ǵana tóleıdi. Bul jeke kásipkerler úshin 2%-dan 4%-ǵa deıin, JShS úshin 8%-ǵa deıin bolady. Tek kompanııanyń jyldyq aınalymy 2,2 mıllıard teńgeden aspaýy, al shtatta 200 adamnan kóp bolmaýy qajet. Salyqty jeńildetý kıno, beınekontent pen telebaǵdarlamalardy óndirýge jáne odan keıingi óndiriske, mýzykalyq shyǵarmalarǵa dybys jazý men basyp shyǵarýǵa, teatr jáne mýzeı ónerine, sáýlet jáne dızaınǵa, qolóner buıymdaryna, halyq shyǵarmashylyǵyna jáne kádesyılar óndirisine áser etedi. Osy qoldaý sharasyn ázirleý barysynda halyqaralyq tájirıbeni muqııat taldaǵanymyzdy atap ótkim keledi. Eń ozyq elderdiń (Ulybrıtanııa, Germanııa, Ońtústik Koreıa) tájirıbesi kreatıvti ındýstrııany damytý úshin salyqty jeńildetýge erekshe mán berý kerektigin kórsetedi», dep jazdy Aıda Balaeva .