Qazaqstan Premer-mınıstri Álıhan Smaıylov pen Eýropalyq komıssııanyń vıse-prezıdenti Margarıtıs Shınas Qazaqstan men Eýropalyq odaqtyń saýda-ekonomıkalyq qatynastaryn nyǵaıtý jónindegi qadamdardy talqylady.
Astanada ótken kezdesý aıasynda taraptar taýar aınalymyn ulǵaıtý, ınvestısııalar tartý, kólik-logıstıka salasyndaǵy yntymaqtastyqty nyǵaıtý, vızalyq rejimdi jeńildetý, ónerkásip kooperasııasyn ulǵaıtý jáne basqa da birqatar máseleni qarastyrdy.
Úkimet basshysy Qazaqstan Eýropalyq odaqpen ózara tıimdi qarym-qatynastardy nyǵaıtýǵa erekshe mán beretinin atap ótti. Bul rette Keńeıtilgen áriptestik pen yntymaqtastyq týraly kelisim, sondaı-aq EO-nyń Ortalyq Azııa boıynsha jańa strategııasy mańyzdy ról atqarady.
«Biz ózara senim men qurmetke negizdelgen Qazaqstan-Eýropa yntymaqtastyǵyn odan ári kezeń-kezeńmen damytýdy qoldaımyz», dedi Á.Smaıylov.
Premer-mınıstr atap ótkendeı, EO – Qazaqstannyń iri saýda jáne ınvestısııalyq seriktesteriniń biri. EO úlesine syrtqy saýdanyń shamamen 30%-y jáne tartylǵan ınvestısııalardyń shamamen 40%-y tıesili. Máselen, ótken jyldyń 11 aıynda taýar aınalymy 5%-ǵa jýyq ósip, shamamen 38 mlrd dollarǵa jetti. 2022 jyly EO-dan Qazaqstanǵa salynǵan ınvestısııalar kólemi 12,5 mlrd dollardy qurap, keıingi 10 jyldaǵy eń joǵary deńgeıdi kórsetti.
«Búginde Qazaqstanda 6 myńǵa jýyq birlesken kásiporyn jumys isteıdi, onyń 130-y ótken jyly ǵana qosyldy. Bul kórsetkishter eýropalyq seriktesterge ekonomıkamyzdyń turaqtylyǵy men tartymdylyǵyn kórsetedi. Eýropanyń ınvestısııalyq qoǵamdastyǵyn birlesken jobalarǵa keńinen qatysýǵa shaqyramyz», dedi Á.Smaıylov.
Sonymen qatar Úkimet basshysy ózara is-qımyldyń mańyzdy baǵyty tranzıttik kólik salasy ekenin aıtty. Búginde Qytaıdan Eýropaǵa jiberiletin taýarlardyń shamamen 85%-y Qazaqstan arqyly tasymaldanady. Atap aıtqanda, ótken jyly Transkaspıı halyqaralyq kólik baǵyty aıasynda júkterdi aýystyryp-tıeý kólemi 65%-ǵa ósti. Ortamerzimdi perspektıvada mundaǵy júk aǵynyn 10 mln tonnaǵa deıin jetkizý josparlanyp otyr.
«Osy maqsatqa jetý úshin Ázerbaıjan, Grýzııa jáne Túrkııamen atalǵan baǵyttyń «tar jerlerin» joıý boıynsha jol kartalarǵa qol qoıyldy. Sondaı-aq Qazaqstanda temirjol, port ınfraqurylymyn jańǵyrtý, jyljymaly quram men saýda flotyn ulǵaıtý boıynsha birqatar iri ınfraqurylymdyq joba iske asyrylyp jatyr. Biz sondaı-aq júk jóneltýshige naqty ýaqyt rejiminde óz júkteriniń qaıda ekenin kórsetýge múmkindik beretin aqparat júıelerin bir retke keltirip jatyrmyz», dedi Úkimet basshysy.
О́z tarapynan Eýropalyq komıssııanyń vıse-prezıdenti Qazaqstannyń Eýropalyq odaq úshin mańyzdy áriptes ekenin atap ótti.
«Qazaqstanda aýqymdy jańǵyrtý úderisteri júrip jatqanyn bilemiz. Eýropalyq odaq atynan Qazaqstandy Ortalyq Azııa óńirindegi mańyzdy oıynshy etip otyrǵan Prezıdent Qasym-Jomart Toqaevtyń bastamasymen iske asyp jatqan reformalardyń mańyzdylyǵyn atap ótkim keledi», dedi M.Shınas.
Ol sondaı-aq «Global Gateway» bastamasy aıasynda ótetin Eýropa men Ortalyq Azııa arasyndaǵy kólik qatynastaryn turaqty damytý jónindegi aldaǵy Investorlar forýmynyń mańyzyn atap ótti. Forým jumysyna Qazaqstan da qatysady.