Australian Open: Birde-bir tennısshimiz qalmady

Rybakına ekinshi matchyn dú­nıe­júzilik reıtıngide 57-oryn­da turǵan reseılik Anna Blınko­vamen ótkizdi. Osyǵan deıin qos qarsylas 2017 jyly Sankt-Pe­terbýrgte ótken týrnırde kezdesip, onda reseılik sportshy 5:7, 6:2, 6:3 esebimen jeńgen edi.

Bul joly birinshi partııada esep 1:1 bolǵan mezette Blınkova breık jasap, sol basymdyǵyn saqtap qaldy – 6:4. Ekinshi sette de reseılik tennısshi breıkpen alǵa ketti – 2:1. Degenmen óz oıy­nyn taba bastaǵan Rybakına tarazy basyn teńestirdi – 2:2. Ar­tynsha taǵy bir breıkpen támamdady – 6:4.

Úshinshi, sheshýshi partııada Rybakına bosańsyǵan sátti qalt jibermegen Blınkova taǵy alǵa shyqqanymen (3:1) jerlesimiz esepti teńestire aldy – 4:4. Blınkova qaıyra breık jasap, matchqa dop bergende, esep qaıta teńesti – 5:5.

Esep 6:5 bolǵan mezette reseılik sportshy eki matchbolyn múlt jiberdi. Esesine jarty saǵattan astam ýaqytqa sozylǵan taı-breıkte Rybakına segiz match­bolyn paıdalana almady – 6:7 (20:22). 2 saǵat 46 mınýtqa sozylǵan asa tartysty báseke bary­synda E.Rybakına 9 eıs jasap, 8 breık-poınttyń beseýin múlt jibergen joq. Qarsylasy 3 eıs, 5 breıkpen (6 breık-poınt) kózge tústi.

Sondaı-aq Qazaqstannyń juptyq syndaǵy birinshi, álem­niń 44-raketkasy Anna Danılına  Aýstralııa ashyq chempıonatynyń ekinshi aınalymyna shyǵa almady. Al erler arasynda Qazaq­stannyń birinshi, álemniń 27-raketkasy Aleksandr Býblık,  Aleksandr Nedovesov jarys jolynan shyǵyp qaldy.

Osylaısha, Aýstralııa ashyq chempıonatynda Qazaqstannyń birde-bir tennısshisi qalmady.