1973 jyldyń 18 sáýirinde jazýshy, qoǵam qaıratkeri, akademık Sábıt Muqanov 73 jasynda Almaty qalasynda dúnıeden ótti.
«Sábıttiń ómiri men eńbegi jazýshynyń bir basynyń ereksheligin ǵana baıan etpeıdi. Ol qazaq ádebıetiniń tarıhyndaǵy asa kúrdeli dáýirdiń ósken jolyn, izdengen múddesine jetken órisin de baıan etedi», dep zańǵar jazýshy Muhtar Áýezov aıtqandaı, Sábeń sóz joq óz dáýiriniń tarlan qalamgeri bolǵany anyq. Kózi tirisinde bıikten túsip kórgen joq. Jaryqtyq ómiriniń sońynda da sol bıikti ańsaǵan eken.
«Kádimgi Sábıt Muqanov» atty estelikter jınaǵynda orys jazýshysy Alekseı Bragın, naýqasy meńdep Sovmınniń aýrýhanasynda jatqan Sábeńniń alqymyna ajal tirelip, baqıǵa attanar shaqta jary Márııamǵa aıtqan sońǵy sózin keltiredi. «Márııam meni qaıda túsirip barady mynalar? Men tómenge emes, taýǵa shyqqym keledi», depti marqum («Kádimgi Sábıt Muqanov». Estelikter jınaǵy (qurastyrǵan: S.Shaımerdenov, Q.Ergóbekov). – Almaty: Jazýshy, 1984. 295-b).
Zamandasy Ǵabıt Músirepov aıtqandaı, onyń darynynyń qaınar kózi – halyqtyń qalyń ortasy men qazaqtyń keń baıtaq dalasy edi. Sondyqtan da shyǵar onyń ólimi kúlli buqarany qaıǵyrtty. Jazýshynyń qazasy haqynda «Sosıalıstik Qazaqstan» gazetinde 1973 jyl, 20 sáýir, №93 sany resmı qazanama jarııalanyp, oǵan Qazaqstan Kompartııasy Ortalyq Komıtetiniń birinshi sekretary D.A.Qonaevtan bastap, barlyq respýblıka dárgeıindegi atqaminerler kóńil aıtypty.
Gazettiń kelesi kúngi (21 sáýir, №94) sanynda aqyn Ǵafý Qaıyrbekovtiń joqtaý jyry jarııalanypty. Onda:
«Kózim kúıip barady jastan meniń,
Taǵdyr shirkin, tas pa ediń, tastan ba ediń,
Qaıran Sábe, sýymaı jatyr áli,
Tabanyńmen kep-keshe basqan jeriń.
Árqashan da dańqyń bar soǵan senbek,
Qaldyrdyń sen baı mura, eren eńbek,
Tomdaryńdy qoltyqtap bara jatqan,
San urpaqtyń júregi soǵar sen dep...»
dep jazylypty.
Osylaı almatylyqtar shejire-jazýshy Sábıt Muqanovty 21 sáýir kúni aqtyq saparǵa shyǵaryp salady. Biraq bul sharýanyń ishinde qaharman atamyz Baýyrjan Momyshuly bola almapty. Sebebi syrqattanyp, aýrýhanada jatqan. Sóıtse de, jazýshynyń jaryna hat jazyp, kóńil aıtqan eken. Hatta: «Qadirli jeńgem Márııam, qaraqtarym balalar! Abzal aǵam Sákeńniń alys sapar salǵanyna qatty qaıǵyryp jatyrmyn. Basyna barýyma doktorlar rýhsat etpeı otyr. Aýyr qaıǵylaryńyzǵa ortaqpyn. Orny tolmas abzal aǵamnyń jatqan jeri torqa bolsyn. B.Momyshuly. 20.04.73 j. Bolnısa».
Bul jádiger qazir S.Muqanov pen Ǵ.Músirepovtiń ádebı-memorıaldyq mýzeı kesheniniń qorynda saqtaýly tur. Mýzeı qyzmetkerleriniń aıtýyna qaraǵanda, bul hat-jádigerdi jarynyń qujat-qaǵazdarymen birge Márııam Muqanova tapsyrypty.