Byltyr 5 myńnan astam turǵynnyń abattandyrý erejesin buzǵandyǵy týraly derek usynǵan senator Andreı Lýkın depýtattyq saýalynda vandalızmniń jıilep ketkeni týraly másele qozǵady, dep habarlaıdy Egemen.kz Senattyń baspasóz qyzmetine silteme jasap.
Tártip buzýshylar jasyl jelekterdi, aǵashtardy joıǵan, aıaldamalardy, lıftterdi buzǵan, basqa da ınfraqurylymdyq jáne kóshedegi sándik nysandardy qıratqan.
«Bir kezderi Mańǵystaý oblysyndaǵy Ybyqty saı shatqalynyń qabyrǵasyna esimin balǵa-qashaýmen oıyp jazǵan mádenıet salasy sheneýniginiń áreketi jurtshylyq arasynda dúmpý týǵyzǵan edi. Árıne, tártip buzǵandarǵa aıyppul salynýy da, qamaýǵa alynýy da múmkin. Zańnamalyq túzetýler ótken jyldyń basynda qabyldandy. Degenmen, tájirıbe kórsetip otyrǵandaı, qoldanystaǵy sharalar jetkiliksiz bolyp otyr», dedi Senat depýtaty.
Andreı Lýkın Parlament depýtattary vandalızm kórinisteri úshin jaýapkershilikti odan ári kúsheıtý máselesin pysyqtap jatqanyn, sondaı-aq Úkimetke onymen kúresý tetikterin usynǵanyn aıtty.
«Vandalızm úshin jaýapkershilikti kúsheıtýdi jáne zańnamaǵa tıisti ózgerister engizýdi usynamyn. Qazirgi ýaqytta vandalızmge qarsy kúres negizinen quqyqtyq salada jazalaý arqyly júzege asyrylady. Sondyqtan halyqaralyq oń tájirıbeni paıdalaný múmkindigin qarastyrý jáne vandalızmniń aldyn alýda kreatıvti ındýstrııa ókilderiniń qatysýyn pysyqtaý mańyzdy. Olar óz ónimderi arqyly jańa jaǵdaıdyń aldyn alýǵa, halyqtyń, ásirese jastardyń mádenıetin kóterýge yqpal etedi, mundaı áreketterdiń zańsyzdyǵyn qoljetimdi tásildermen túsindire alady», dedi depýtat.