О́tken jyl Syr mádenıeti men óneri úshin nátıjeli boldy. Bıyl da bul salada el nazaryn aýdarar aqjoltaı jańalyq kóbeımek. Sonyń bastysy – aldaǵy naýryz aıynan Syrda «Rýhanııat jyly» bastaý alady. Bul týraly oblys ákimi Nurlybek Nálibaev oblystyq máslıhat sessııasynda aıtty.
О́ńir basshysy sońǵy eki jylda aımaqtyń mádenıet pen rýhanııat salasynda aýqymdy jumystar atqarylǵanyn atap ótti. Qyzylordada mesenat Marat Dúısenbaevtyń demeýshiligimen quny 1 mlrd 700 mln teńge bolatyn «Anaǵa taǵzym» ortalyǵy ashylyp, 1 mlrd 500 mln teńgege salynǵan «Otbasy ortalyǵy» óz qyzmetin bastady. Arheologterdiń uzaq jylǵy eńbegi arqasynda burynnan búginge jetken Shirik-Rabattaǵy saq jaýyngeri men Syǵanaq hanshaıymynyń altyndatqan músinderi jasalyp, oblystyq mýzeıdiń qundy murasyna aınaldy.
– Alda tarıhshylardyń ǵylymı negizdemeleri men arheologııalyq qazba nátıjelerine súıenip, altyn kıimdi «Túgisken kósemi», «Jetiasar aqsúıek áıeli» rekonstrýksııalary jasalady. Sonymen qatar, osy kúnge deıin shetelderde saqtalǵan bizdiń óńirge qatysty jádigerlerdiń kóshirmeleri el nazaryna usynylatyn bolady. Ulttyq qundylyqtarymyzdy dáriptep, salt-dástúrlerimizdi nasıhattaý maqsatynda halqymyzdyń jyl basy jáne jańarý aıy – naýryzdan bastap Syr óńirinde «Rýhanııat jyly» bastaý alady. Jyl aıasynda tek mádenı-kópshilik sharalar ǵana emes, aýqymdy jobalar júzege asyrylady, – dedi Nurlybek Mashbekuly.
Jurtshylyq sońǵy jyldary bul salada úzilip qalǵan úrdisterdiń qaıta jalǵasqanyn da jaqsylyqqa balap otyr. Mysaly, byltyr on jyl burynǵy bastama qaıta jańǵyryp, mádenıet salasyn damytýǵa úles qosqan óner jáne ádebıet ókilderine «Turan» syılyǵy tabystaldy. Oblys tarıhynda tuńǵysh ret 50-den asa kásibı mýzykanttan jasaqtalǵan sımfonııa orkestri quryldy. Múmkindigi shekteýli ónerpazdardyń shyǵarmashylyǵyn shyńdaýǵa arnalǵan ınklıýzıvti teatr úıirmesi jumysyn bastady. О́z aldyna kásibı ujym bolyp qaıta qurylǵan qalalyq «Jastar teatry» Syrda sahna ónerin óristetýde jańa lep ákeldi.
О́tken jyl túıindeler tusta elordada Qyzylorda oblysynyń mádenıet jáne óner kúnderi ótti. Astana jurty Syr ónerpazdarynyń shyǵarmashylyǵyna erekshe yqylas bildirip, oń baǵa berdi. Alda osyndaı mádenı shara Almaty qalasynda uıymdastyrylady.
Jaqyn kúnderi 1000 oryndyq О́ner ortalyǵy qyzmetin bastaıdy, Jyraýlar úıi ashylady. Barlyq aýdanda neke qııý zaly, kitaphana, mýzeı, arhıv, jastar saraıy, ardagerler men analar úıi oryn tebetin «Rýhanııat» ortalyqtary salynady. Balalar men jasóspirimderdiń shyǵarmashylyǵyn shyńdaý maqsatynda oblys ortalyǵynan «Shyǵarmashylyq akademııasy» boı kóteredi.
Sońǵy jyldary halyq jıi qonystana bastaǵan sol jaǵalaýdan jańa ólketaný mýzeıi salynatyny da Syr rýhanııatyndaǵy serpindi jańalyq bolyp otyr.
QYZYLORDA