Taldyqorǵan qalasynyń 28 jastaǵy turǵyny úshem dúnıege ákeldi. Bul – Jetisý oblysy jańadan qurylǵannan beri ómirge kelgen alǵashqy úshem. Sábılerine Zeınep, Zeıin, Zeınur degen esim bergen Dúmbergenovterdiń tuńǵyshy qazir 10 jasta. Sóıtip jas otbasy kópbalaly atanyp otyr, dep habarlaıdy Egemen.kz Jetisý oblysy ákiminiń baspasóz qyzmetine silteme jasap.
«Bıyl 10 qańtarda olardyń eki ul, bir qyzy merziminen buryn dúnıege keldi. Alǵashqy kúnderi olardyń jaǵdaıy aýyr boldy. Balalardyń densaýlyǵyn bir aıdan astam ýaqyt dárigerler baqylaýda ustady. Bir aı kóleminde náresteler 400 gramǵa deıin salmaq qosty. Qazirgi ýaqytta balalardyń densaýlyǵy qalypty», deıdi Taldyqorǵandaǵy oblystyq perınataldyq ortalyqtyń bólim meńgerýshisi, shtattan tys neonatolog Danııar Rasýlov.
Oblystyq densaýlyq saqtaý basqarmasy ókilderi úshemdi shyǵaryp salý rásimine arnaıy baryp, sábılerge arnalǵan jórgekter jıyntyǵyn tartý etti.