Turan dańǵylyndaǵy Orynbor men Baǵlanova kósheleriniń aralyǵynda ınjenerlik jelilerdi tóseý jumysy júrgiziledi. Osyǵan baılanysty 2024 jylǵy 21 aqpan men 9 naýryz aralyǵynda kólik qozǵalysy eki baǵytta da shekteledi, dep habarlaıdy Egemen.kz Astana ákimdiginiń baspasóz qyzmetine silteme jasap.
Irgeles ýchaskelerde tıisti jol belgileri ornatylyp, baǵdarshamdardyń jumys rejımderine túzetýler engizildi. Qosymsha aqparattyq belgiler ornatyldy.
Balamaly baǵyttar Aıtmatov kóshesi men Qabanbaı batyr dańǵyly bolyp sanalady.
«Atalǵan ýaqytta keptelisterdi azaıtý úshin Qabanbaı batyr dańǵylyndaǵy avtobýs jolaqtarymen júrýge ýaqytsha ruqsat etiledi. Olar boıynsha qozǵalys buzylystaryn tirkeý óshiriledi. № 26, 27, 40 qalalyq avtobýstardyń baǵyty ózgertildi», delingen ákimdik habarlamasynda.
Jol qaýipsizdigi maqsatynda polısııa departamenti júrgizýshilerge óte muqııat bolyp, marshrýtty aldyn ala josparlaý qajet ekenin eskertedi. Jaıaý júrginshiler de barynsha saq bolýy kerek.